საქართველო, 12 აპრილი, საქინფორმი. ესტონეთში, ქუვეითში, ისრაელსა და მოლდოვაში საქართველოს ელჩები თანამდებობებს ტოვებენ. უკვე გამოიცა მთავრობის შესაბამისი განკარგულებები.

დიპლომატების გათავისუფლების წინადადებით მინისტრთა კაბინეტი საქართველოს პრეზიდენტს მიმართავს.

საქართველოს ელჩი ესტონეთში თეა ახვლედიანი თანამდებობას დატოვებს პირველი ივნისიდან; საქართველოს ელჩი ქუვეითში როლანდ ბერიძე და საქართველოს ელჩი ისრაელში პაატა კალანდაძე – პირველი ივლისიდან; საქართველოს ელჩი მოლდოვაში მერაბ ანთაძე კი 2020 წლის პირველი იანვრიდან.

საგარეო საქმეთა სამინისტროს ინფორმაციით, ელჩების ცვლილება გეგმურია და როტაციის ვადის გასვლას უკავშირდება.

მთავრობის განკარგულებები 5 აპრილით თარიღდება და მათ პრემიერ-მინისტრი მამუკა ბახტაძე აწერს ხელს.