სამართალი
საქართველოს შსს-მ კაა ისევ დააპატიმრა

 საქართველო, 26 თებერვალი, საქინფორმი. საქინფორმი დაწვრილებით აშუქებდა სააკაშვილის მიერ დაფინანსებულ და მართულ აქციას, რომელიც ცნობილია, როგორც „შვილმოკლული მამების აქცია“. როგორც მკითხველს ახსოვს, აქცია მიჰყავდა სააკაშვილის დროინდელი პოლიციის ყოფილ თანამშრომელს, მისი დანაშაულებრივი დავალებების შემსრულებელ ზვიად კუპრავას, რომელიც, როგორც საქინფორმი იუწყებოდა, სააკაშვილს ამსტერდამში აკითხავდა ინსტრუქციებისთვის. ერთ-ერთ მიტინგზე შარშან კუპრავამ სახელი გაითქვა, იმიტომ რომ მთვრალი ყვიროდა მიკროფონში „კაა!“, მხედველობაში ჰყავდა რა ბიძინა ივანიშვილი, რომელიც „პითონივით“ გუდავს საქართველოს. ამის შემდეგ კუპრავამ რიგი დანაშაულები ჩაიდინა, სამართალდამცველებს შეურაცხყოფდა და თავს აპატიმრებინებდა. სააკაშვილის დავალებით, მან მცირე ხანი ციხეში უნდა გაატაროს, რათა „სრულფასოვანი დევნილი ოპოზიციონერი პოლიტიკოსი“ გახდეს.

და აი, შინაგან საქმეთა სამინისტროს ინფორმაციით, „სამართალდამცავთა რეფორმირების ცენტრის“ ხელმძღვანელი ზვიად კუპრავა სასამართლოს გადაწყვეტილების საფუძველზე დააკავეს.

„როგორც საზოგადოებისთვის ცნობილია, 2018 წლის 11 ივნისს ზვიად კუპრავამ სასამართლოს შენობაში სიტყვიერი შეურაცხყოფა მიაყენა მოსამართლეს, რისთვისაც მას ბრალი წარედგინა სისხლის სამართლის კოდექსის 366-ე მუხლით (სასამართლოს უპატივცემულობა). აღნიშნული დანაშაულისთვის ზვიად კუპრავას აღკვეთის ღონისძიების სახით შეეფარდა გირაო, იმ მიზნით, რომ თავიდან ყოფილიყო აცილებული ბრალდებულის მხრიდან ახალი დანაშაულის ჩადენა და უზრუნველყოფილიყო სამართალდამცავ ორგანოში/სასამართლოში მისი გამოცხადება.

სასამართლოს უპატივცემულობის შემდეგ, გირაოს ქვეშ მყოფმა ზვიად კუპრავამ, ასევე სასამართლოს მიმდებარე ტერიტორიაზე, ფიზიკური შეურაცხყოფა მიაყენა ადვოკატს. აღნიშნული ქმედებისთვის ზვიად კუპრავას სისხლის სამართლის კოდექსის 126-ე მუხლით (ძალადობა) ბრალი დაუსწრებლად წარედგინა, ვინაიდან მან თავი აარიდა სამართალდამცავ ორგანოში გამოცხადებას.

გირაოს პირობების დარღვევის – ახალი დანაშაულის შესაძლო ჩადენის, სამართალდამცავ ორგანოში არგამოცხადების, მართლმსაჯულებისთვის თავის არიდების – გამო, სასამართლოს გადაწყვეტიებით მიმდინარე წლი 21 თებერვალს ზვიად კუპრავას გირაო შეეცვალა უფრო მკაცრი აღკვეთის ღონისძიებითპატიმრობით. აღსანიშნავია, რომ სასამართლო სხდომა ჩატარდა ზვიად კუპრავას გარეშე, ვინაიდან ბრალდებულმა თავი აარიდა მართლმსაჯულებასაც.

2019 წლის 24 თებერვალს სასამართლოს გადაწყვეტილების აღსრულების მიზნით განხორციელდა ზვიად კუპრავას დაკავება. დაკავების პროცესი აღბეჭდილია პოლიციის სამხრე კამერებზე“, - აღნიშნულია შსს-ს მიერ გავრცელებულ ინფორმაციაში.