საქართველო, 20 თებერვალი, საქინფორმი. თქვენ მე დამპატიჟეთ საქართველოში და, რა თქმა უნდა, ძალიან ბედნიერი ვიქნები, ვუპასუხო თქვენს მოწვევას და გეწვიოთ საქართველოში, – ასე მიმართა საქართველოს პრეზიდენტ სალომე ზურაბიშვილს საფრანგეთის პრეზიდენტმა ემანუელ მაკრონმა პირისპირ შეხვედრის შემდეგ გამართულ ერთობლივ ბრიფინგზე.

ემანუელ მაკრონმა შეხვედრაზე განხილულ საკითხებზე, ასევე საქართველო-საფრანგეთის სამომავლო თანამშრომლობაზე ილაპარაკა.

„რაც შეეხება ჩვენს სამომავლო გეგმებს საქართველოსთან მიმართებაში, ის, რომ საქართველოს განსაკუთრებული პატივისცემა აქვს ევროკავშირის ქვეყნების მხრიდან, ამის დასტურია ასოცირების ხელშეკრულებაზე ხელმოწერა, რაც კონკრეტულად სარგებლის მომტანი გახდა საქართველოს მოსახლეობისთვის, ეს იქნება განათლების, კულტურული თუ უსაფრთხოების კუთხით. ამ მიმართულებით სამომავლოდ ვიმუშავებთ, ვითანამშრომლებთ და ჩვენ თქვენს გვერდით გვიგულეთ“, – განაცხადა საფრანგეთის პრეზიდენტმა.

ამასთან, როგორც მან აღნიშნა, შეხვედრაზე ემიგრაციასთან დაკავშირებულ საკითხებზეც ისაუბრეს.

„ჩვენ შევეხეთ ემიგრაციასთან დაკავშირებულ საკითხებს. აქაც უნდა გავაძლიეროთ ჩვენი კონტაქტები, თანამშრომლობა, რომ შემცირდეს საემიგრაციო ნაკადი საქართველოდან“, – განაცხადა ემანუელ მაკრონმა.

საფრანგეთის პრეზიდენტის თქმით, მან ქართველი კოლეგისგან საქართველოში მიწვევა მიიღო.

„ქალბატონო პრეზიდენტო, თქვენ მე დამპატიჟეთ საქართველოში და, რა თქმა უნდა, ძალიან ბედნიერი ვიქნები, ვუპასუხო თქვენს მოწვევას და გეწვიოთ საქართველოში“, – მიმართა ემანუელ მაკრონმა და აღნიშნა, რომ შეხვედრაზე საფრანგეთში ქართველ ხელოვანთა ნამუშევრების გამოფენის მოწყობაზეც იმსჯელეს.