საქართველო, 18 თებერვალი, საქინფორმი. „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძე გამოძიებისთვის მიცემულ ჩვენებაში ამბობს, რომ არ იცოდა, თუ „სამგორი თრეიდისა“ და „სამგორი ემისგან“ ნასესხები თანხა მისივე ბანკიდან გატანილი სესხი იყო. ამის შესახებ პირველ არხს საქართველოს გენერალური პროკურატურის საზოგადოებასთან და მასმედიასთან ურთიერთობის დეპარტამენტის უფროსის მოადგილემ გიორგი გრძელიშვილმა განუცხადა.

პირველმა არხმა გენერალურ პროკურატურას გამოძიების მიმდინარეობისა და მამუკა ხაზარაძის მიერ მიცემული ჩვენების შესახებ კითხვით მიმართა. უწყებაში გამოკითხვის მხოლოდ ერთ ნაწილზე ილაპარაკეს.

„როგორც გამოკითხვისას მამუკა ხაზარაძემ ჩვენებაში აღნიშნა, მან არ იცოდა, რომ ეს თანხა, რომელიც ავთანდილ წერეთლის კომპანიისგან ისესხა, მისივე ბანკიდან იყო გატანილი სესხის სახით. მამუკა ხაზარაძის თქმით, ეს რომ სცოდნოდა, აღნიშნულ თანხას ხელს არ მოჰკიდებდა. რაც შეეხება ზოგადად საქმეს, გამოძიება გრძელდება და გამოძიების მიმდინარეობის შესახებ საზოგადოებას დამატებით ეცნობება“, – განუცხადა პირველ არხს გიორგი გრძელიშვილმა.

პირველი არხი ასევე დაინტერესდა, შეესაბამება თუ არა სიმართლეს მედიაში გავრცელებული ინფორმაცია პროკურატურის მიერ ფულის გამთეთრებელთა სიაში მამუკა ხაზარაძის შეყვანასთან დაკავშირებით. უწყებაში განაცხადეს, რომ მსგავსი ინფორმაცია პროკურატურას არ გაუცია და საგამოძიებო უწყებაში ასეთი ბაზა არ არსებობს.

საქართველოს მთავარმა პროკურატურამ უკანონო შემოსავლების ლეგალიზაციის ფაქტზე სისხლის სამართლის საქმის გამოძიება 2018 წლის 2 აგვისტოს დაიწყო. უწყების ინფორმაციით, გამოძიებით დადგენილია, რომ 2008 წლის აპრილში და მაისში შპს „სამგორი თრეიდმა“ და შპს „სამგორი ემმა“ „თიბისი ბანკისგან“, სათანადო უზრუნველყოფის გარეშე, დაჩქარებული წესით მიიღეს საერთო ჯამში 17 მილიონ აშშ დოლარამდე სესხი. კომპანიების ანგარიშებზე სესხის თანხის განთავსებისთანავე მამუკა ხაზარაძემ და ბადრი ჯაფარიძემ ამავე კომპანიებიდან, როგორც ფიზიკურმა პირებმა, ისესხეს ზუსტად იმ ოდენობის თანხა, რაც „თიბისი ბანკმა“ საბრუნავი საშუალებების შევსების მიზნობრიობით ასესხა დასახელებულ კომპანიებს. 2008 წლის ბოლოს „თიბისი ბანკმა“ აღნიშნული სესხები საბანკო რეგულაციებით დადგენილ ვადაზე ადრე, დაუსაბუთებლად ჩამოწერა და გარე საბალანსო ანგარიშზე გადაიტანა, ხოლო 2012 წელს საერთოდ გაათავისუფლა ეს კომპანიები ბანკის წინაშე არსებული სასესხო ვალდებულებისგან, როდესაც დათანხმდა ამ ვალდებულებების ოფშორულ კომპანიაზე გადატანას. გარდა ამისა, პროკურატურის ინფორმაციით, დადგენილია, რომ მამუკა ხაზარაძესა და ბადრი ჯაფარიძეს არ გაუსტუმრებიათ შპს „სამგორი თრეიდისა“ და შპს „სამგორი ემის” ვალი.