საქართველო, 7 იანვარი, საქინფორმი. დეპუტატი დავით ჭიჭინაძე საგაზაფხულო სესიაზე „პატრიოტთა ალიანსის“ დატოვებას გეგმავს და ახალი პოლიტიკური მოძრაობის ჩამოყალიბებას არ გამორიცხავს.

თავის გეგმებზე და „პატრიოტთა ალიანსის“ დატოვებაზე ჭიჭინაძემ პრესკონფერენციაზე ილაპარაკა.

„„პატრიოტთა ალიანსს“ საგაზაფხულო სესიაზე დავტოვებ. სესია 7 თებერვალს გაიხსნება და განცხადებას გავაკეთებ. მიზეზი არაფერი, დროებით ვიყავი შესული და ეს დრო გავიდა. რასაც ვამბობ, იმას ვაკეთებ და ვთქვი, რომ საგაზაფხულო სესიაზე დავტოვებდი „პატრიოტებს“. ვცდილობ, მაქსიმალურად დავიცვა პირობები და ამიტომ სხვებსაც ვაიძულებ, ჩემთან მიმართებაში პირობები დაიცვან“, – განაცხადა ჭიჭინაძემ.

როგორც დეპუტატმა აღნიშნა, მისი პოლიტიკური ცხოვრება და შეხედულებები „პატრიოტთა ალიანსის“ წარმომადგენლებისგან განსხვავდება.

„არის საკითხები, სადაც ჩვენი შეხედულებები ერთმანეთს არ ემთხვევა. მე შევედი გარკვეულად უმრავლესობაში, რადგან მიმაჩნდა, რომ ამ ქვეყანაში მთავარი გამოწვევა სიღარიბე იყო და „ქართული ოცნება“ დეკლარირებას აკეთებდა, რომ ის იყო სოციალურად ორიენტირებული პარტია, სინამდვილეში მივიღეთ ულტრალიბერალური პარტია. საერთოდ რაზეა ორიენტირებული, ღირებულებების გარეშე მივიღეთ. ადამიანი პოლიტიკაში უბრალოდ იმიტომ არ უნდა მოვიდეს, რომ თბილი სავარძელი დაიკავოს, არამედ ხალხის ინტერესებისთვის უნდა იბრძოლოს“, – განაცხადა დავით ჭიჭინაძემ.

ჭიჭინაძის თქმით, ის პოლიტიკურ ბრძოლას განაგრძობს.

„დღეს არის ძალიან დიდი გამოწვევა, რომელსაც სჭირდება პოლიტიკური ბრძოლა და მე ამ პოლიტიკურ ბრძოლას გავაგრძელებ. ვისთან ერთად, ცოტა ხანში მოგახსენებთ“, – აღნიშნა დეპუტატმა, დავით ჭიჭინაძემ.