საქართველო, 29 ნოემბერი, საქინფორმი. ქერჩის სრუტეში ვითარების ესკალაციის გამო მოსკოვის წინააღმდეგ სანქციების გამკაცრებას საფრანგეთმა და გერმანიამ მხარი არ დაუჭირეს. ინფორმაციას გერმანული „დოიჩე ველე“ ავრცელებს. როგორც პუბლიკაციაშია ნათქვამი, ბრიუსელში ევროკავშირის პოლიტიკისა და უსაფრთხოების კომიტეტის სხდომაზე რუსეთის წინააღმდეგ სანქციების გამკაცრება ევროკავშირის თავმჯდომარე ავსტრიამ მოითხოვა. ინიციატივას მხარი ესტონეთმა და პოლონეთმა დაუჭირეს, თუმცა პარიზისა და ბერლინის წარმომადგენლები წინააღმდეგ წავიდნენ.

საფრანგეთმაც და გერმანიამაც კონფლიქტის მხარეებს შორის ნდობის აღდგენისაკენ მიმართული ნაბიჯების გადადგმა მოითხოვეს, თუმცა ბერლინსა და პარიზში განაცხადეს, რომ ასეთ ნაბიჯებს შორის სანქციების გამკაცრებას არ მოიაზრებენ.

შეგახსენებთ, რუსეთსა და უკრაინას შორის ურთიერთობა 25 ნოემბერს გამწვავდა, როდესაც რუსმა მესაზღვრეებმა ქერჩის სრუტეში მოძრავ უკრაინულ გემებს ცეცხლი გაუხსნეს. შემდეგ კი რუსეთის უსაფრთხოების ფედერალურმა სამსახურმა უკრაინელი სამხედროები და გემები დააკავა.