საქართველო, 21 ნოემბერი, საქინფორმი. საქართველოს მთავარი პროკურატურა შეისწავლის ხელისუფლების ინიციატივას ე. წ. შავ სიაში შეყვანილი მოქალაქეების ვალების დაფარვის შესახებ, იუწყება საინფორმაციო სააგენტო Новости-Грузия უწყების პრესსამსახურზე დაყრდნობით.

პრემიერ–მინისტრ მამუკა ბახტაძის განცხადებით, საქართველოს ხელისუფლება საბანკო დავალიანებას იმ მოქალაქეებს დაუფარავს, რომლებიც ე.წ. შავ სიაში არიან მოხვედრილი. საუბარია მილიარდ-ნახევრამდე ლარის დავალიანებაზე. ვალი საქველმოქმედო ფონდ „ქართუს“ მხარდაჭერით დაიფარება, რომლის დამფუძნებელია ყოფილი პრემიერი, მმართველი პარტია „ქართული ოცნება – დემოკრატიული საქართველოს“ დამფუძნებელი ბიძინა ივანიშვილი.

იმავე დღეს ავტორიტეტულმა არასამთავრობო ორგანიზაციებმა „საქართველოს ახალგაზრდა იურისტთა ასოციაცია“, „საერთაშორისო გამჭვირვალობა – საქართველო“ და „სამართლიანი არჩევნებისა და დემოკრატიის საერთაშორისო საზოგადოება“ გაავრცელეს ერთობლივი განცხადება, რომლის თანახმად, მთავრობის ეს ინიციატივა საპრეზიდენტო არჩევების მეორე ტურის წინ ამომრჩევლის მოსყიდვის ნიშნებს შეიცავს.

„ეს არის კერძო ხასიათის შეთანხმება, რომელიც ეხება მოსახლეობის დიდ ნაწილს. შევისწავლით და დანაშაულის ნიშნების არსებობის შემთხვევაში მივიღებთ შესაბამის გადაწყვეტილებას“, – აღნიშნეს პროკურატურაში.

ვალების ჩამოწერა შეეხება იმ მოქალაქეებს, რომლებიც ერთ წელზე მეტია, ვერ იხდიან ბანკების ან სხვა ფინანსური ორგანიზაციების ვალებს. ამასთან, ბანკების ვალი 2 ათას ლარს არ უნდა აღემატებოდეს (პროცენტებისა და ჯარიმების გაუთვალისწინებლად).

საპრეზიდენტო არჩევნების მეორე ტური 28 ნოემბერს ჩატარდება. მეორე ტურში გავიდა ორი კანდიდატი - „ერთიანი ნაციონალური მოძრაობის“ წევრი გრიგოლ ვაშაძე და სალომე ზურაბიშვილი, რომელსაც მხარს მმართველი პარტია „ქართული ოცნება - დემოკრატიული საქართველო“ უჭერს.