საქართველო, 12 ნოემბერი, საქინფორმი. საქართველოში ისევ მიწისძვრა მოხდა. ბიძგების ეპიცენტრი ქალაქ ონთან, სოფელ მართგაჯინაში იმავე ადგილას დაფიქსირდა, სადაც 6 ნოემბერს 5,2 მაგნიტუდის მიწისძვრა მოხდა. ინფორმაციას სეისმური მონიტორინგის ეროვნული ცენტრი ავრცელებს.

მიწისძვრის სიმძლავრე, პირველადი ინფორმაციით, 3,0 მაგნიტუდა იყო.

მანამდე მიწისძვრა თბილისში მოხდა.

გახშირებული მიწისძვრების გამო სეისმოლოგიურ ცენტრში აცხადებენ, რომ ახლად აშენებულმა კორპუსებმა, შესაძლოა, ძლიერ ბიძგებს ვერ გაუძლოს.

სეისმოლოგიური ცენტრი მოუწოდებს ხელისუფლებას, დააწესონ სპეციალური რეგულაციები, რომლითაც კორპუსების სეისმოლოგიურობა მკაცრად გაკონტროლდება.

„თბილისიც სეისმურად აქტიურია. ამიტომ ჩვენი მოვალეობაა, გავაფრთხილოთ მოსახლეობა, რომ ასეთ ტერიტორიაზე, როგორიც საქართველოა, სამშენებლო ინდუსტრია უნდა იყოს განვითარებული, რეგულაციები უნდა იყოს ძალიან მკაცრი იმისთვის, რომ დავიცვათ მოსახლეობა.

სერიოზული დარღვევებია კვლევით კომპონენტში. იმიტომ, რომ მშენებლობა მხოლოდ აგურის აგურზე დადება არ არის და არქიტექტურა არ არის. ლამაზი სახლები ძალიან მოგვწონს, მაგრამ მთავარია, ეს სახლები ფეხზე იდგეს, როდესაც მიწისძვრა მოხდება. ამიტომ საინჟინრო კუთხით არის ყურადღება მისაქცევი“, - განაცხადა დედამიწის შემსწავლელ მეცნიერებათა ინსტიტუტისა და სეისმოლოგიის ეროვნული ცენტრის დირექტორმა თეა გოდოლაძემ.

7-8 ნოემბერს საქართველოში 5 მიწისძვრა დაფიქსირდა.