პოლიტიკა
არჩევნები - 2018: არ დავუშვებთ, რომელიმე უპასუხისმგებლო პოლიტიკურმა ძალამ საარჩევნო პროცესში დისონანსი შეიტანოს, ირწმუნება საქართველოს პრემიერ-მინისტრი

 საქართველო, 26 ოქტომბერი, საქინფორმი. ამის შესახებ საქართველოს პრემიერ-მინისტრმა მამუკა ბახტაძემ მთავრობის სხდომის დაწყების წინ განაცხადა.

მისი თქმით, საქართველო საპრეზიდენტო არჩევნებით დემოკრატიის კიდევ ერთ, ძალიან მნიშვნელოვან ტესტს ჩაატარებს.

რამდენიმე დღეში ჩვენ ძალიან მნიშვნელოვანი და საპასუხისმგებლო დღე გვაქვს. ქვეყანაში ტარდება საპრეზიდენტო არჩევნები. მინდა, მოვუწოდო ჩვენს მოქალაქეებს, მივიდეთ არჩევნებზე და გავაკეთოთ სასურველი არჩევანი. საქართველო ამ არჩევნებით კიდევ ერთ, ძალიან მნიშვნელოვან დემოკრატიის ტესტს ჩაატარებს და მჯერა, რომ ყველა ერთად, თითოეული მოქალაქე ამ ტესტს ჩავაბარებთ ისე, როგორც ჩვენს ქვეყნას ეკადრება“, – აღნიშნა ბახტაძემ.

საქართველოს პრემიერ-მინისტრის თქმით, მთავრობამ გააკეთა ყველაფერი, რათა ეს არჩევნები ჩატარებულიყო თავისუფალ, გამჭვირვალე და დემოკრატიულ გარემოში.

თუმცა აქვე ისიც მინდა აღვნიშნო, რომ საზოგადოების მოთხოვნა და სურვილი, ჰქონოდა ნამდვილი ევროპული ტიპის წინასაარჩევნო კამპანია, ვერ მოხერხდა ბოლომდე გარკვეული პოლიტიკური ძალების დესტრუქციული რიტორიკის გამო. ჩვენ არ დავუშვებთ, რომ საარჩევნო პროცესში დისონანსი შეიტანოს რომელიმე უპასუხისმგებლო პოლიტიკურმა ძალამ. მთელ წინასაარჩევნო პერიოდში ყველა პოლიტიკური სუბიექტისთვის უზრუნველყოფილი იყო თანაბარი და კონკურენტული გარემო. შესაბამისად, გპირდებით, რომ თითოეულ ამომრჩეველს ექნება საშუალება, გააკეთოს თავისუფალი არჩევანი და თითოეული ამომრჩევლის ხმა იქნება დაცული“, – განაცხადა მამუკა ბახტაძემ.