საზოგადოება
ქართველი ემიგრანტი: "მე პრეზიდენტმა მომატყუა!”

yushitashviliსაქართველოში დაბრუნებული ემიგრანტები ისევ უცხოეთში ბრუნდებიან.

როგორც არასამთავრობო ორგანიზაცია "ქართველი ემიგრანტების" ხელმძღვანელი ზვიად ყუშიტაშვილი აცხადებს, საქართველოს პრეზიდენტის, მიხეილ სააკაშვილის განცხადებას, ემიგრანტების სამშობლოში დაბრუნებასთან დაკავშირებით, თავის დროზე არაერთი ემიგრანტი გამოეხმაურა და დასაქმების საპრეზიდენტო დაპირების იმედით, საქართველოშიც კი დაბრუნდნენ, მაგრამ დღემდე უმუშევრები არიან.

"ჩვენი არასამთავრობო ორგანიზაცია 2010 წლის მარტში დაფუძნდა. მასში 1800 საქართველოში დაბრუნებული ემიგრანტი გაერთიანდა. ყველა მათგანი მიხეილ სააკაშვილის სიტყვებს ენდო და სამშობლოში ჩამოვიდა, მაგრამ პრეზიდენტის დაპირება არ შესრულდა და ისინი უმუშევრები დარჩნენ," - განაცხადა ზვიად ყუშიტაშვილმა.

საქინფორმის კორესპონდენტი ერთ-ერთ ემიგრანტს დაუკავშირდა, რომელმაც განაცხადა:

"საერთოდ არ მინდა ამ თემაზე საუბარი. უბრალოდ, ერთს ვიტყვი: ვერ ვიტან, როდესაც თავს მოტყუებულად ვგრძნობ, მე კი პრეზიდენტმა მომატყუა!"