აქტუალური
ოჯახმა წითელი ჯვრისგან მიიღო ინფორმაცია, რომ საოკუპაციო რეჟიმის მიერ დაკავებულ მაია ოთინაშვილს დაზიანებები არ აღენიშნება

 საქართველო, 5 ოქტომბერი, საქინფორმი. საოკუპაციო რეჟიმის მიერ დაკავებული მაია ოთინაშვილის ოჯახმა წითელი ჯვრის წარმომადგენლებისგან მიიღო ინფორმაცია, რომ დაკავებულს ფიზიკური დაზიანებები არ აღენიშნება.

როგორც პირველ არხს მაია ოთინაშვილის მეუღლემ იგორ მაყიშვილმა განუცხადა, მათ წითელი ჯვრის წარმომადგენლები ტელეფონით დაუკავშირდნენ და მოკლე ინფორმაცია მიაწოდეს.

იგორ მაყიშვილის თქმით, მაია ოთინაშვილი წითელი ჯვრის ცხინვალის ოფისის წარმომადგენლებმა მოინახულეს და როგორც ისინი აცხადებენ, საოკუპაციო რეჟიმის მიერ დაკავებულს გარეგნული დაზიანებები არ აღენიშნება.

სახალხო დამცველმა ნინო ლომჯარიამ მანამდე გაავრცელა ინფორმაცია, რომ ოჯახის ინფორმაციით, რუსი სამხედროების მიერ დაკავებული მაია ოთინაშვილი ნაცემია, რის შემდეგაც ოჯახის წევრებმა განაცხადეს, რომ მათთვის გაუგებარია, რა ცნობებზე დაყრდნობით გაავრცელა სახალხო დამცველმა ინფორმაცია მაია ოთინაშვილის ცემის შესახებ.

რუსმა სამხედროებმა საოკუპაციო ხაზთან გორის რაიონის სოფელ ხურვალეთში მცხოვრები 37 წლის ქალი 29 სექტემბერს დააკავეს. ცხინვალიდან მიღებული ბოლო ინფორმაციით, მაია ოთინაშვილს 10-დღიანი ე.წ. წინასწარი პატიმრობა აქვს შეფარდებული.