სამართალი
ლეიბორისტები წყლის დიფერენცირებულ გადასახადს მოითხოვენ
ლეიბორისტები წყლის დიფერენცირებულ გადასახადს ითხოვენ. როგორც სპეციალურ ბრიფინგზე ლეიბორისტული პარტიის ისნის რაიონის კოორდინატორმა თეიმურაზ მჭედლიშვილმა განაცხადა, თბილისის ბევრ უბანში, მათ შორის ვაზისუბანში, ნუცუბიძის ფერდობებზე და ვაჟა-ფშაველას კვარტლებში სასმელი წყალი მოსახლეობას გრაფიკით მიეწოდება, საფასურს კი ჩვეულებრივი ტარიფით იხდიან, რაც კანონდარღვევაა.
"ჩვენ აღნიშნულ ტარიფსაც ვეწინააღმდეგებით, რადგან ის უკანონოა, მაგრამ, ვისაც გრაფიკით აქვს წყალი, 3 ლარისა და 15 თეთრის ნაცვლად, 1 ლარსა და 5 თეთრს უნდა იხდიდეს, რადგან მათ წყალმომარაგება, 24 საათის ნაცვლად, 8 საათი აქვთ", – განაცხადა თეიმურაზ მჭედლიშვილმა.
ლეიბორისტული პარტიის აღმასრულებელი მდივნის – პაატა ჯიბლაძის მტკიცებით კი, 2013 წლამდე "ჯორჯიან უოთერ ენდ ფაუერს" სატენდერო პირობების თანახმად, მოსახლეობისთვის წყლის მიწოდების საფასური არ უნდა გაეზარდა.
ჯიბლაძის თქმით, წყალზე საფასურის გაზრდა პრეზიდენტ მიხეილ სააკაშვილის სურვილით განხორციელდა.
