საქართველო, 2 ოქტომბერი, საქინფორმი. გვესმის, როგორი დამოკიდებულებაა რუსეთის მიმართ, შევეცდებით, ამას რამე მოვუხერხოთ, შევეცდებით, ყველაფერი პოზიტივის გამოყენებით და კონსტრუქციული მსჯელობით გავაკეთოთ, – ასეთი კომენტარი გააკეთა რუსეთის საგარეო საქმეთა მინისტრის მოადგილემ გრიგორი კარასინმა საქართველოს პრემიერ-მინისტრის მამუკა ბახტაძის გაერო-ში გამოსვლის კომენტირებისას.

როგორც კარასინმა პრაღაში, პირველ არხთან სუბრისას აღნიშნა, მსგავსი განცხადებები იმედგაცრუებას იწვევს.

„ჩვენ ვკითხულობთ საქართველოს ხელისუფლების განცხადებებს, მაგალითად, საქართველოს პრემიერ-მინისტრის გამოსვლას გაერო-ში. გვესმის, როგორი დამოკიდებულებაა რუსეთის მიმართ. შევეცდებით, ამას რამე მოვუხერხოთ, შევეცდებით, ყველაფერი პოზიტივისა და კონსტრუქციული მსჯელობის გამოყენებით გავაკეთოთ. ის საკითხები, რომლებიც შეგვიძლია წინ წავწიოთ, დაგვეხმარება პოლიტიკურ კუთხითაც, პოლიტიკური ურთიერთობების აღზრდაში. ასეთ ფსონს ვაკეთებთ. ასეთი განცხადებები ჩვენს იმედგაცრუებას იწვევს, რადგან ეს არის კრიტიკა ჩემი ქვეყნის მიმართ. ცინიკურად ჟღერს აფხაზეთთან და სამხრეთ ოსეთთან ურთიერთოებების დამყარების სურვილი და, ამავე დროს, ამ ქვეყნების დადანაშაულება იმაში, რომ იქ არანორმალური ვითარებაა, ადგილი აქვს ჰუმანიტარულ კატასტროფას. ნაბიჯების გადადგმის ნაცვლად, ფაქტობრივად, ხდება არსებული მექანიზმების ჩაშლა. ვგულისხმობ ინციდენტების პრევენციისა და მათზე რეაგირების მექანიზმს.

ჩვენ პრაღაში შეხვედრას ვმართავთ, რათა გადავჭრათ ის საკითხები, რისი გადაჭრაც შეგვიძლია. ეს არის სატრანსპორტო, სახმელეთო, საჰაერო მიმოსვლა, სავაჭრო ურთიერთობები, ჰუმანიტარული კონტაქტები, სავიზო საკითხები, ამ არასრული 6 წლის განმავლობაში რაღაც გამოგვივიდა. იმედი გვაქვს, ეს კონსტრუქციული ტენდენცია გაგრძელდება. არ გამოგვივიდა პოლიტიკური ნაწილი“, – განაცხადა კარასინმა.

საქართველოს პრემიერ-მინისტრმა მამუკა ბახტაძემ გაერო-ს გენერალურ ასამბლეას ქართულ ენაზე მიმართა. მან რუსეთის ფედერაციას მოუწოდა, შეასრულოს ნაკისრი საერთაშორისო ვალდებულებები და გაიყვანოს ჯარები საქართველოს ტერიტორიიდან.