საქართველო, 7 სექტემბერი, საქინფორმი. ტურიზმის ეროვნული ადმინისტრაციის ხელმძღვანელის გიორგი ჩოგოვაძის შეფასებით, საერთაშორისო ტურიზმის განვითარებით მთელი ქვეყანა ძლიერდება. ამის შესახებ ჩოგოვაძემ ბახმაროში განაცხადა, სადაც ხელისუფლების წევრებთან ერთად დოღი-2018-ს ესწრებოდა.
"2018 წელი ახალი რეკორდების წელი იქნება ტურისტული თვალსაზრისით; მათ შორის, დიდი მატებაა საქართველოს შიდა ტურიზმის მიმართულებით; თქვენ ხედავთ, რამდენი ადამიანი ესწრება ამ ღონისძიებას; ბახმაროს გააჩნია უნიკალური კლიმატი და ჰაერი, როგორც შიდა, ასევე საერთაშორისო ტურიზმის თვალსაზრისით“, - განაცხადა ჩოგოვაძემ და დასძინა, რომ საქართველოს წელს პირველად 8 მილიონზე მეტი საერთაშორისო მოგზაური ეწვევა.
„8,5 მილიონ საერთაშორისო მოგზაურს ველოდებით წლის ბოლომდე. წელს იქნება პირველი წელი, როდესაც საერთაშორისო ტურიზმიდან შემოსავლები 3 მილიარდ აშშ დოლარს გადასცდება. რა თქმა უნდა, ეს ყველაფერი ჩვენი ქვეყნის ეკონომიკისთვის ძალიან მნიშვნელოვანია. დაახლოებით 200 000 ადამიანია სექტორში დასაქმებული და ეს ადამიანები და მთელი ქვეყანა ძლიერდება საერთაშორისო ტურიზმის განვითარებით; ზრდა გვაქვს როგორც მეზობელი ქვეყნებიდან, ასევე ევროკავშირის და, ასევე, სპარსეთის ყურის ქვეყნებიდან“, - აღნიშნა ჩოგოვაძემ.
2018 წლის ზაფხულის სეზონზე (ივნისი-აგვისტო) საქართველოში 3,061,338 საერთაშორისო მოგზაურის ვიზიტი შედგა, ზრდა წინა წლის ანალოგიურ პერიოდთან შედარებით +10.9%-ია. საერთაშორისო ვიზიტორთა მიერ განხორციელებულმა ვიზიტების რაოდენობამ 2,492,924 შეადგინა, ზრდა +11.5%. ტურისტული ვიზიტების რაოდენობამ 1,702,015 შეადგინა, რაც 232,294-ით მეტია 2017 წლის ივნისი-აგვისტოს მაჩვენებელზე (ზრდა +15.8%)
2018 წლის იანვარ-აგვისტოში, წინა წლის ანალოგიურ პერიოდთან შედარებით, საქართველოში ტურისტული ვიზიტების რაოდენობა 19,3%-ით გაიზარდა.
ყველაზე მეტი საერთაშორისო ვიზიტი შემდეგი ქვეყნებიდან შედგა:
• აზერბაიჯანი (+11%);
• რუსეთი (+22%);
• სომხეთი (+0,3%);
• თურქეთი (+21,1%).
პოზიტიური ტენდენცია ნარჩუნდება ევროკავშირის ქვეყნების მიმართულებიდან, საიდანაც საქართველოში საერთაშორისო ვიზიტორების ვიზიტების რაოდენობის ზრდის კუთხით გამოირჩეოდნენ:
• ესტონეთი +98%;
• ნიდერლანდები +55%;
• რუმინეთი +55%;
• ბელგია +53%;
• გერმანია +50%;
• ჩეხეთი +47%;
• ესპანეთი +47%;
• გაერთიანებული სამეფო +46%.
განსაკუთრებული ზრდა დაფიქსირდა შემდეგი ქვეყნებიდან:
• კორეის რესპუბლიკა +139%;
• ჩინეთი +92%;
• ბელარუსი +44%;
• ქუვეითი +44%;
• ისრაელი +35%.