საქართველო, 7 სექტემბერი, საქინფორმი. საქართველოს საგარეო საქმეთა სამინისტრო ბრიუსელში, ნატოს შტაბბინაში გამართული ნატო-საქართველოს კომისიის სხდომის შესახებ ინფორმაციას ავრცელებს.

უწყების ცნობით, მუდმივი წარმომადგენლების დონეზე ნატო-საქართველოს კომისიის სხდომაზე განიხილეს რუსეთ-საქართველოს კონფლიქტთან დაკავშირებული პრობლემატიკა.

სხდომას თავმჯდომარეობდა ნატოს გენერალური მდივანი იენს სტოლტენბერგი. შეხვედრაზე ქართულ მხარეს წარმოადგენდნენ სახელმწიფო მინისტრი შერიგებისა და სამოქალაქო თანასწორობის საკითხებში ქეთევან ციხელაშვილი და საგარეო საქმეთა მინისტრის მოადგილე დავით დონდუა.

ნატო-საქართველოს კომისიის სხდომამდე ორმხრივი შეხვედრა გაიმართა ნატოს გენერალური მდივნის მოადგილესთან როუზ გოტმიოლერთან. საქართველოს საგარეო უწყების ცნობით, შეხვედრებზე განიხილეს საქართველოს მთავრობის ინიციატივა „ნაბიჯი უკეთესი მომავლისკენ“, ჟენევის საერთაშორისო მოლაპარაკებების მიმდინარეობა და კონფლიქტის მშვიდობიანი გზით მოგვარების მიმართულებით საქართველოს ხელისუფლების მიერ წარმოებული პოლიტიკა.

„ქართულმა დელეგაციამ ალიანსს ამომწურავი ინფორმაცია მიაწოდა რუსეთის აგრესიიდან 10 წლისთავზე ოკუპირებულ ტერიტორიებზე შექმნილი ვითარების, ადამიანის უფლებათა დარღვევების, რუსეთის გამალებული შეიარაღების, სამხედრო წვრთნებისა და ანექსიისკენ გადადგმული ნაბიჯების თაობაზე“, – აღნიშნულია საქართველოს საგარეო საქმეთა სამინისტროს ინფორმაციაში.

მათივე ცნობით, კომისიის სხდომაზე ნატოს წევრი ქვეყნების წარმომადგენლებმა კიდევ ერთხელ დაადასტურეს საქართველოს ტერიტორიული მთლიანობისა და სუვერენიტეტის მტკიცე ერთგულება.

„წევრი ქვეყნების ელჩებმა შეშფოთება გამოხატეს კონფლიქტის რეგიონებში შექმნილი რთული უსაფრთხოებისა და ჰუმანიტარული ვითარების გამო და დაგმეს რუსეთის აგრესიული ქმედებები. ჩრდილოატლანტიკური საბჭოს მხრიდან გამოიხატა ერთსულოვანი მხარდაჭერა საქართველოს სამშვიდობო პოლიტიკის, მათ შორის ახალი სამშვიდობო ინიციატივის მიმართ“, – ნათქვამია საქართველოს საგარეო უწყების ინფორმაციაში.

ამასთან, საქართველოს საგარეო საქმეთა სამინისტროს ცნობით, მხარეებმა შეხვედრაზე აგრეთვე მიმოიხილეს საქართველოსთან მიმართებით ნატოს ბრიუსელის სამიტზე მიღებული გადაწყვეტილებები, საქართველოს ნატოში ინტეგრაციის პროცესი და თანამშრომლობის სამომავლო გეგმები.