საქართველო, 7 სექტემბერი, საქინფორმი. ხორავას ქუჩაზე მომხდარი მკვლელობის შემსწავლელი დროებითი საგამოძიებო კომისიის დასკვნას საქართველოს პრემიერ-მინისტრი ეხმაურება. მამუკა ბახტაძემ განცხადება მთავრობის სხდომის დაწყებამდე გააკეთა.

საქმე ეხება "ევროპული საქართველოს" მიერ მომზადებულ დასკვნას, სადაც კონკრეტული მაღალჩინოსნების, მათ შორის იუსტიციის მინისტრისა და შს მინისტრის პასუხისმგებლობაზეა ლაპარაკი.

კითხვაზე - უნდა გაიზიარონ თუ არა პოლიტიკური პასუხისმგებლობა შს და იუსტიციის მინისტრებმა, პრემიერი პირდაპირ არ პასუხობს. მამუკა ბახტაძე ამბობს, რომ კომისიის ფუნქცია არა პოლიტიკური კონტექსტის დადგენა, არამედ გამოძიების პროცესში არსებული ხარვეზების გამოვლენა იყო.

„მე შევაფასებდი ზოგადად საგამოძიებო კომისიის ფუნქციას, რომლის მთავარი ფუნქცია გახლავთ გამოძიების პროცესში შესაძლო ხარვეზების დადგენა და რეკომენდაციების მიცემა თვითონ გამოძიებაზე, და არა სისხლის სამართლებრივი დანაშაულის შეფასება და, მითუმეტეს, პოლიტიკური შეფასება. როდესაც ხდება პოლიტიკური შეფასება, ეს, რა თქმა უნდა, ობიექტურობას აყენებს კითხვის ნიშნის ქვეშ. სამწუხაროდ, ამ დოკუმენტის დიდი ნაწილი გახლავთ სწორედ პოლიტიკური შეფასებები“, - განაცხადა მამუკა ბახტაძემ.