საქართველო, 21 აგვისტო, საქინფორმი. 20 აგვისტოს, საქართველოში ნატოს სწავლების Noble Partner 2018-ის დასრულებიდან 5 დღის შემდეგ, სწავლების ხელმძღვანელი ქართული მხრიდან, გენერალური შტაბის სახმელეთო ჯარების აღმოსავლეთის სარდალი შავლეგო ტაბატაძე იმერეთის მხარის გუბერნატორად დაინიშნა.

ახალი გუბერნატორები საქართველოს შვიდ რეგიონში დაინიშნა, ორის გარდა - კახეთის გუბერნატორმა ირაკლი ქადაგიშვილმა და რაჭა-ლეჩხუმ-ქვემო სვანეთის გუბერნატორმა არჩილ ჯაფარიძემ თანამდებობები შეინარჩუნეს.

ახალი სახელმწიფო რწმუნებულები პრემიერ-მინისტრმა მამუკა ბახტაძემ მთავრობის ადმინისტრაციაში წარადგინა. ესენი არიან:

სამეგრელო–ზემო სვანეთის რეგიონი - ალექსანდრე მოწერელია;

გურიის რეგიონი – ზურაბ ნასარაია;

სამცხე-ჯავახეთი – ბესიკ ამირანაშვილი;

მცხეთა-მთიანეთი – შალვა კერესელიძე;

ქვემო ქართლი – შოთა რეხვიაშვილი;

შიდა ქართლი – გიორგი ხოჯევანიშვილი;

იმერეთი – შავლეგო ტაბატაძე.

პრემიერის თქმით, საკადრო ცვლილებები გუბერნატორების მოადგილეებსაც შეეხებათ.

შვიდი რეგიონიდან ხუთი გუბერნატორი თანამდებობიდან მიმდინარე წლის 26 ივლისს გათავისუფლდა, მათ შორის არ ყოფილა გურიის გუბერნატორი. გურიის რეგიონის სახელმწიფო რწმუნებულის მერაბ ჭანუყვაძის მიერ თანამდებობის დატოვების შესახებ ცნობილი გუშინ გახდა.