ივანიშვილი: პერიოდი, როდესაც ერთი გუნდი იყო მარტო თავისუფალი, კანონით პასუხს არ აგებდნენ, გავიარეთ, იმ ხალხს მისტირის მარგველაშვილი
საზოგადოება
ივანიშვილი: პერიოდი, როდესაც ერთი გუნდი იყო მარტო თავისუფალი, კანონით პასუხს არ აგებდნენ, გავიარეთ, იმ ხალხს მისტირის მარგველაშვილი

     საქართველო, 26 ივლისი, საქინფორმი. მინისტრები ყველა დემოკრატიულ სახელმწიფოში შეიძლება გამოკითხონ, ეს ნორმალურია, მაგრამ ამ თემასთან დაკავშირებით გიორგი მარგველაშვილის დასმული შეკითხვა პასუხს არ იმსახურებს, – ამის შესახებ პარტია ქართული ოცნება - დემოკრატიული საქართველოს თავმჯდომარემ ბიძინა ივანიშვილმა პირველი არხის გადაცემაში „აქტუალური თემა მაკა ცინცაძესთან ერთად“ განაცხადა.

„პროცესი მიდის, მე არ დავასწრებ მოვლენებს და ვერც დავასწრებ. ვფიქრობ, რომ ნორმალურია. ყველა დემოკრატიულ სახელმწიფოში შეიძლება მსგავსი რამ მოხდეს. იმას, რასაც კითხულობს ეს კაცი, მარგველაშვილი, რომ ტრაქტორების და კაბელების საქმეს არ დაემსგავსოს, ასეთ კითხვებზე პასუხს არ იმსახურებს. გიორგი მარგველაშვილმა მოახერხა, რომ 8 მილიონი, რომელიც სააკაშვილმა უკანონოდ ბიუჯეტიდან დახარჯა, უწოდა პიჯაკების თემა და ის პოლიტიკურ დევნილადაც დაასახელა. შესაბამისად, ეს კაცი ჩემგან არ იმსახურებს მსგავს კითხვებზე პასუხის გაცემას. რადგან კითხვა დაისვა, საზოგადოებას მაინც შევახსენებ, რომ .. ტრაქტორების საქმე ჩემთვის დღესაც საამაყოა. მე ვიყავი მაშინ პრემიერ-მინისტრი, დათო კირვალიძე იყო სოფლის მეურნეობის მინისტრი, რომელსაც მე ფავორიტ მინისტრად ვასახელებდი და ასეც იყო“, – განაცხადა ივანიშვილმა.

როგორც ბიძინა ივანიშვილმა აღნიშნა, როდესაც დავით კირვალიძის მიმართ პროკურატურას შეკითხვები გაუჩნდა, მას სთხოვა, რომ გამოძიების პროცესში თანამდებობიდან გადამდგარიყო, რაც კირვალიძემ გააკეთა.

„როდესაც გაჩნდა კითხვა პროკურატურიდან, მე მისი დაცვა კი არ დავიწყე, მას ვთხოვე, რომ პროკურატურისთვის მიეცა საშუალება და გამოძიების პროცესში გადამდგარიყო, რაც მან გააკეთა კიდეც. რომ არ დარჩეს განცდა, რომ კირვალიძეს ფორმალურად ვასახელებდი ფავორიტად და ჭეშმარიტად სხვა დამოკიდებულება მქონდა, დღესაც ვმეგობრობ კირვალიძესთან და რამდენიმე დღის წინ კიდევ მქონდა მეგობრული შეხვედრა, სოფლის მეურნეობის საკითხებზე მსჯელობაც გვქონდა. ეს არის ხელწერა, რომელიც ჩვენ მოვიტანეთ გუნდში და ძალიან მეამაყება. როდესაც ამას უარყოფით კონტექსტში შეგვახსენებენ, სამწუხაროა, რომ საზოგადოების გარკვეული ნაწილი, ოპოზიციური ნაწილი, „ნაციონალური მოძრაობის“ რიტორიკაზე გადავიდა ბოლომდე და მას იზიარებენ. ამ დროს აქ კითხვა არ უნდა დაისვას. ეს არის ის ხელწერა, რაც ჩვენ მოვიტანეთ და მასშივე ჯდება ე.წ. კაბელების საქმეც. ის პერიოდი, როდესაც ერთი გუნდი იყო მარტო თავისუფალი და კანონით პასუხს არ აგებდნენ, გავიარეთ და გადავიტანეთ. იმ ხალხს მისტირის მარგველაშვილი დღეს. სირცხვილია ასეთი პოზიცია, კაცს, რომელსაც პრეტენზია აქვს ან დემოკრატიულობაზე, ან სახელმწიფოებრიობაზე, ან სახელმწიფო მოღვაწეობაზე, კითხვას ასეთი რაკურსით სვამდეს, ცოტა უხერხულია“, – განაცხადა ბიძინა ივანიშვილმა.