საქართველო, 20 ივლისი, საქინფორმი. სომხეთის მთავრობაში განმარტავენ, თუ რატომ გამოდიან გაერო-ში საქართველოს მიერ ინიცირებული რეზოლუციების წინააღმდეგ, რომლებიც აფხაზეთსა და ცხინვალის რეგიონებში დევნილების დაბრუნებას ითვალისწინებს.

„საქართველოში საკმაოდ მტკივნეულად რეაგირებენ სომხეთის ამ პოზიციაზე. რატომ არ შეუძლია ქვეყანას, მაგალითად, თუნდაც თავშეკავება კენჭისყრის დროს?“, – ამ კითხვით მიმართა პირველი არხის ჟურნალისტმა სომხეთის საგარეო უწყების პრესმდივან ტიგრან ბალაიანს და საგარეო ურთიერთობათა საკითხებში სომხეთის პრემიერ-მინისტრის მრჩეველ არსენ ხარატიანს.

სომხეთის მთავრობაში აღიარებენ, რომ ქართულ მხარესთან ამ თემაზე საუბარი უკვე მრავალი წელია მიმდინარეობს.

„ჩვენ უმაღლეს დონეზე ვთავაზობდით ქართველ კოლეგებს: შევთანხმდეთ და თავი შევიკავოთ ერთმანეთის წინააღმდეგ რეზოლუციებზე კენჭისყრისგან. ასევე, არ მოვაწეროთ ხელი ისეთ განცხადებებს, რომლებიც საქართველოსა და სომხეთის ინტერესების საწინააღმდეგოა. ჩვენ ამას ვთავაზობდით უმაღლეს დონეზე. ქართული მხარე აქამდე გვპასუხობდა, რომ ეს არ შეუძლია. ამაშია საქმე“, – განაცხადა სომხეთის საგარეო საქმეთა სამინისტროს პრესმდივანმა ტიგრან ბალაიანმა პირველი არხის კითხვაზე.

სომხეთის პრემიერ-მინისტრის მრჩევლის არსენ ხარატიანის ინფორმაციით კი, მხარეებს შორის არსებობს ერთგვარი შეთანხმება, რომ საერთაშორისო ორგანიზაციებში ცალკეულ საკითხებზე უთანხმოება ქვეყნების ორმხრივ ურთიერთობებზე ნეგატიურად არ აისახება.

„მოდით ვისაუბროთ, მოდით შევთანხმდეთ. გაერო-ში არის რეზოლუცია, როდესაც საქართველო სომხეთის ინტერესების წინააღმდეგ გამოდის“, – აღნიშნა ხარატიანმა.

შეკითხვაზე - გაერო-ს რეზოლუციაზე სომხეთის განსხვავებული პოზიციის შემთხვევაში ხომ არ გამოიწვევს ეს რუსეთის ნეგატიურ რეაქციას - ნიკოლ ფაშინიანის მრჩეველმა განაცხადა: „თქვენ შეგიძლიათ ნახოთ, თუ როგორია საერთაშორისო ორგანიზაციებში სომხეთის მიერ ხმის მიცემის სპექტრი და ამ კითხვაზე პასუხი გასაგები იქნება“.