აქტუალური
განათლების, მეცნიერების, კულტურისა და სპორტის მინისტრად ბიზნესისა და ტექნოლოგიების უნივერსიტეტის რექტორის მიხეილ ბატიაშვილის კანდიდატურა სახელდება
საქართველო, 11 ივლისი, საქინფორმი. პირველი არხის ინფორმაციით, მმართველ გუნდში მიხეილ ბატიაშვილი მინისტრობის ერთ-ერთ კანდიდატად განიხილება.
პირველმა არხმა ბატიაშვილთან დაკავშირება სცადა, თუმცა მან სატელეფონო ზარებს არ უპასუხა. რაც შეეხება მინისტრის მოადგილეებს, პარლამენტში არსებული ინფორმაციით, მთავრობაში ერთ-ერთ ვერსიად განიხილება, რომ მინისტრის მოადგილეებად, დარგების შესაბამისად, მოქმედი მინისტრები მიხეილ გიორგაძე და მიხეილ ჩხენკელი დაინიშნებიან.
პრემიერ-მინისტრი მამუკა ბახტაძე მთავრობის განახლებულ შემადგენლობას, სავარაუდოდ, დღეს დაასახელებს, თუმცა მანამდე კონსულტაციებს საპარლამენტო უმრავლესობასთან გაივლის. წინასწარი ინფორმაციით, განათლების, მეცნიერების, კულტურისა და სპორტის სამინისტროს გარდა, ცვლილებები ეკონომიკური გუნდის მინისტრებს – ფინანსთა და ეკონომიკის სამინისტროების ხელმძღვანელებს შეეხებათ. საკანონმდებლო ორგანო კი მთავრობისთვის ნდობის გამოცხადების პროცედურას ხვალ, 12 ივლისს დაიწყებს და 14 ივლისს დაასრულებს.
