საქართველო, 28 ივნისი, საქინფორმი. რუსეთის ფედერაციისა და აფხაზეთის დე ფაქტო რეჟიმის წარმომადგენლებმა გალში ინციდენტების პრევენციისა და მათზე რეაგირების (IPRM) მექანიზმის ფარგლებში სამუშაო ჯგუფების მორიგი შეხვედრა ჩაშალეს, – ამის შესახებ გალის შეხვედრიდან დაბრუნების შემდეგ პირველ არხთან სახელმწიფო უსაფრთხოების სამსახურის საინფორმაციო-ანალიტიკური დეპარტამენტის უფროსის მოადგილემ ირაკლი ანთაძემ განაცხადა.

მისი თქმით, შეხვედრაზე მთავარი განსახილველი გიგა ოთხოზორიას მკვლელობის საკითხი იყო, თუმცა, რუსეთის ფედერაციისა და აფხაზეთის დე ფაქტო რეჟიმის წარმომადგენლებმა საკითხის დღის წესრიგიდან ამოღება მოითხოვეს.

„საქართველოს მთავრობის მიერ „ოთხოზორია-ტატუნაშვილის სიის“ მიღება რუსეთის ფედერაციისა და აფხაზეთის დე ფაქტო წარმომადგენლების მიერ პოლიტიკურად მოტივირებული ქმედებებისთვის იქნა გამოყენებული. კერძოდ, მათ ფორმატისთვის შეუფერებელი, შანტაჟისა და ულტიმატუმის ფორმით მოითხოვეს გიგა ოთხოზორიას საკითხის შეხვედრის დღის წესრიგიდან ამოღება, რაც, ბუნებრივია, მიუღებელია საქართველოს ცენტრალური ხელისუფლებისთვის, ვინაიდან გიგა ოთხოზორიას მკვლელის მიმართ სამართლის აღსრულება არის საქართველოს ცენტრალური ხელისუფლებისთვის პრიორიტეტული საკითხი“, – განაცხადა ირაკლი ანთაძემ.

მისი ინფორმაციით, აღნიშნულთან დაკავშირებით შესაბამისი განცხადება გაკეთდა, რის შემდეგაც რუსეთის ფედერაციის და დე ფაქტო რეჟიმის წარმომადგენლებმა შეხვედრა ჩაშალეს და დატოვეს.

დადგენილების პროექტი – „ოთხოზორია-ტატუნაშვილის სიის“ შესახებ საქართველოს მთავრობამ დაამტკიცა და პარლამენტს გადაუგზავნა. სიაში ამ ეტაპზე 33 პირია შეყვანილი.