აქტუალური
თბილისში მარეგულირებელი კომისიების საერთაშორისო კონფერენცია ტარდება
საქართველოს ენერგეტიკისა და წყალმომარაგების ეროვნული კომისია ევროპისა და აზიის მარეგულირებელი კომისიების საერთაშორისო კონფერენციას უმასპინძლებს.
დაგეგმილია შეხვედრა ენერგეტიკის მინისტრ ალექსანდრე ხეთაგურთან. შეხვედრის მონაწილეები განიხილავენ ენერგეტიკის რეგულირების რეგიონული ასოციაციის წევრ ქვეყნებში მიმდინარე ენერგეტიკულ პროცესებს, ენერგოეფექტურობის, განახლებადი ენერგიების საკითხებს და იმსჯელებენ საქართველოს ენერგეტიკისა და წყალმომარაგების კომისიის როლსა და მნიშვნელობაზე რეგიონული ასოციაციისათვის. აღსანიშნავია, რომ სემეკი ამ ორგანიზაციის ერთ-ერთი დამფუძნებელია.
ენერგეტიკის რეგულირების რეგიონული ასოციაცია დაარსების 10 წლის იუბილეს საქართველოში აღნიშნავს. ასოციაციის მიზანია წევრ ქვეყნებში ენერგეტიკის რეგულირების პროცესის გაუმჯობესება, სტაბილურობა, ენერგეტიკის დამოუკიდებელი მარეგულირებელი ორგანოების განვითარების ხელშეწყობა და ენერგეტიკის მარეგულირებელ ორგანოებს შორის მჭიდრო კავშირის დამყარება.
