საქართველო, 4 ივნისი, საქინფორმი. „მე შენ გვერდში ვარ, მთავრობა ჩვენ გვერდშია, რევოლუცია არ მინდა! მე მინდა, ჩემი შვილის მკვლელი ბოლომდე დაისაჯოს, სამართლით მეც არ ვარ კმაყოფილი!“, – ასე მიმართა ხორავას ქუჩაზე მოკლული დავით სარალიძის მამას ზაზა სარალიძეს იქვე მოკლული ლევან დადუნაშვილის მამამ დავით დადუნაშვილმა. ის აქციაზე მეუღლესთან ერთად მივიდა.
„მე ლევანის მამა ვარ, ყველას დიდ მადლობას გეტყვით თანადგომისთვის, ყველას, ჩემი ზაზას ოჯახის და ჩემი ოჯახის ტრაგედიის გაზიარებისთვის. მე ამ საღამოს ვუსმენდი ტელევიზიით, აქ რაც ხდებოდა, მაგრამ აღმაშფოთა ერთმა ფაქტმა – მე არასდროს გამოვჩენილვარ არც კამერებთან და არც მიტინგზე, აღმაშფოთა ერთმა ფაქტმა, ორი-სამი საათის უკან აქ გამოვიდა ტიპი, რომელმაც ჩემი შვილის ნათლიად გაასაღა თავი. ეს არ შეიძლება. ეს არ უნდა ხდებოდეს, თუ თანადგომაა, თანადგომა იყოს, ავანტიურებს და ავანტიურისტებს აქ ადგილი არ უნდა ჰქონდეს”, – განაცხადა ლევან დადუნაშვილის მამამ.
როგორც დავით დადუნაშვილმა აღნიშნა, მიმართავს მშობლებს, გამოიყვანონ თავიანთი შვილები და გამოძიებას სწორი ჩვენება მისცენ.
„ჩემი სათქმელი ესაა, მე ზაზას თანადგომას ვუცხადებ, ზაზას გვერდში ვარ. ჩემი და ზაზას ტრაგედია ერთია, საქართველოს ტკივილია, მაგრამ დავიღალეთ. გამოძიება არ სრულდება ბევრი გარემოების გამო. კერძოდ, ვიღაც-ვიღაცები ტელევიზიით, სახლში შეკეტილები ისმენენ ჩვენს ემოციებს. არ გამოჰყავთ თავისი შვილები, რომ ჩვენება მისცენ და სწორი გამოძიება წარიმართოს.
მე შენ გვერდში ვარ, მთავრობა ჩვენ გვერდშია, დავდგეთ ერთად და გამოვიძიოთ. მივცეთ შანსი, სადაც გინდა, პრეზიდენტი გაწყობს, პრეზიდენტთან შევიდეთ, პარლამენტის თავმჯდომარე, იქ შევიდეთ, პრემიერი, იქ შევიდეთ. მე ამ ქვეყანაში ვცხოვრობ, ამ კანონებით ვცხოვრობ, რევოლუცია არ მინდა. მე მინდა, ჩემი შვილის მკვლელი ბოლომდე დაისაჯოს, სამართლით მეც არ ვარ კმაყოფილი, მაგრამ დღეს ეს არის გამოსავალი. სიმართლე უნდა გაირკვეს, თუ ამის შემდეგ კითხვები დარჩება, მე შენს გვერდით ვიქნები. მე „არა“ და „ხო“ არ მაინტერესებს. მე ვამბობ ჩემს პოზიციას, რომელიც მინდა, დავაფიქსირო და რომელიც მინდა, გამოვთქვა წრფელი გულით. მე არ ვარ გამოძიებით ბოლომდე კმაყოფილი.
ამიტომ, თუ კითხვები იქნება, უნდა გამოიძიოს იმ სახელმწიფომ, რომელშიც ვცხოვრობთ. მე ბოლომდე ვენდობოდი გამოძიებას. მე შენს გვერდში ვარ, მაგრამ სადაც გინდა, როგორც გინდა. მე დიდი მადლობას გეტყვით თანადგომისთვის ყველას, მთელი საქართველოს ოჯახებს. ჩემი ლევანი ასე ამბობდა, მთელმა საქართველომ მინდა გამიცნოსო და ზუსტად, რომ გაიცნო. მე ამ ერთხელ გამოვედი და შეიძლება მეტი აღარ გამოვიდე. ის, რაც მოხდა, ჩემთვის არ არის მისაღები, გამოვიდა კაცი, რომელმაც ბუნებაში არ იცოდა, ვინ იყო ჩემი შვილი. ამბობს, რომ ნათლიაა, ეს არ უნდა იკადროს არცერთმა ქართველმა“, – განაცხადა მან.
მას შემდეგ, რაც ლევან დადუნაშვილის მამამ გამოსვლა დაასრულა, ზაზა სარალიძემ წარმოთქვა – „სუსი“.