საზოგადოება
საქართველოს მოქალაქეებს თურქეთში პლანტაციებში სამუშაოდ სპეციალური ნებართვა დასჭირდებათ

     საქართველო, 30 მაისი, საქინფორმი. საქართველოს მოქალაქეები თურქეთში თხილის ან ჩაის პლანტაციებში სამუშაოდ ჩასვლას სპეციალური ნებართვის გარეშე ვერ შეძლებენ. როგორც თურქული მედია იტყობინება, ნებართვის მიღების შემდეგ საქართველოს მოქალაქეებს, გამონაკლისის სახით, 90 დღის გამავლობაში შეეძლებათ თურქეთის ტერიტორიაზე მუშაობა.

საქართველოს მოქალაქეებმა სამსუნში. ორდუში, გირესუნში, ტრაპზონში, რიზესა და ართვინში ჩაის ან თხილის პლანტაციებში სამუშაოდ სპეციალური ნებართვა უნდა მიიღონ. პირველ ეტაპზე სავალდებულოა ინტერნეტში სააპლიკაციო ანკეტის შევსება. თურქეთის შრომის და სოციალური უსაფრთხოების სამინისტროს მიერ შექმნილ ვებგვერდზე აპლიკაცია ხელმისაწვდომია თურქულ, ინგლისურ და ქართულ ენებზე. მეორე ეტაპზე კი უცხო ქვეყნის მოქალაქეებმა შევსებული ანკეტა თურქეთში ადგილობრივი მთავრობის წევრებს უნდა წარუდგინონ“, – წერს თურქული მედია.

როგორც პუბლიკაციაშია აღნიშნული, შესაბამისი ნებართვით, საქართველოს მოქალაქეებს თურქეთში მუშაობა წელიწადში 3 თვის განმავლობაში შეეძლებათ. რეგისტრაციის გარეშე მომუშავე პირებს კი დეპორტაცია დაემუქრებათ.