საქართველო, 29 მაისი, საქინფორმი. ნატოს გაფართოების საკითხზე ვეტოს უფლება არცერთ ქვეყანას არასდროს ექნება. ამის შესახებ განცხადება ჩრდილოატლანტიკური ალიანსის გენერალურმა მდივანმა ვარშავაში ნატოს საპარლამენტო ასამბლეაზე გამოსვლისას გააკეთა. იენს სტოლტენბერგის თქმით, რუსეთის მეზობლებს აქვთ სრული უფლება, თვითონ განსაზღვრონ საკუთარი მომავალი.

აღნიშნული განცხადება ალიანსის გენერალურმა მდივანმა ნიდერლანდების დელეგაციის წევრის შეკითხვის პასუხად გააკეთა. ჰოლანდიელმა დეპუტატმა სტოლტენბერგს ნატოს ყოფილი მეთაურის იაპ დე ჰოპ სხეფერის მიერ მედიასთან გაკეთებულ განცხადებებთან დაკავშირებით დაუსვა შეკითხვა. სხეფერმა განაცხადა, რომ 2008 წელს საქართველოსთვის და უკრაინისთვის ალიანსის წევრობის დაპირება შეცდომა იყო. ჰოლანდიელი დეპუტატი დაინტერესდა, რას ფიქრობს ამ საკითხზე იენს სტოლტენბერგი.

„იდეა, რომ ჩვენ არ უნდა ვუჭერდეთ მხარს ალიანსის გაფართოებას, რადგან რუსეთს ეს არ სურს, ძალიან სახიფათოა. ჩვენ შეგვიძლია გვქონდეს განსხვავებული შეხედულებები გაფართოების პროცესზე. შეგვიძლია ვიდავოთ იმაზე, მიაღწია თუ არა კონკრეტულმა ქვეყანამ პროგრესს, აკმაყოფილებს თუ არა ის სტანდარტებს, მოახდინა თუ არა მან შეიარაღებული ძალების მოდერნიზაცია ან დაძლია თუ არა კორუფცია და შეგვიძლია ვთქვათ, რომ ამ სტანდარტების დაუკმაყოფილებლობის გამო ქვეყანა ალიანსის წევრობას არ იმსახურებს. ეს სამართლიანია, მაგრამ იმის თქმა, რომ ქვეყანა, რომელიც ალიანსის წევრობის ყველა მოთხოვნას აკმაყოფილებს, ვერ გახდება ნატოს წევრი მხოლოდ იმიტომ, რომ ეს რუსეთს არ მოსწონს - დაუშვებელია. მე ვარ პატარა ქვეყნიდან, რომელიც რუსეთის მეზობელია და მათ არ მოსწონდათ, როდესაც ჩვენ ნატოს შევუერთდით. ანუ ამ დროს ვაშინგტონს, ლონდონს ან პარიზს მოსკოვისთვის რომ ეკითხათ, მოგწონს თუ არა, რომ ნორვეგია გვიერთდება, მათი პასუხი იქნებოდა – არა. ამიტომ ნორვეგია ალიანსში არ უნდა შესულიყო? ეს საკითხი ყველა ერის ფუნდამენტურ უფლებებს ეხება. ყველა ერს აქვს სუვერენული უფლება, გადაწყვიტოს საკუთარი მომავალი. მთელი ეს იდეა, რომ დიდ ქვეყნებს აქვთ უფლება, გადაწყვიტონ, რა უნდა გააკეთონ მათმა მეზობლებმა, დაგვაბრუნებს წარსულში. ეს იქნება დაბრუნება ზეგავლენის სფეროების პოლიტიკასთან. ეს არის ის სამყარო, რომელიც ჩვენ არ გვსურს. რუსეთის მეზობლებს აქვთ უფლება, გააკეთონ ის, რაც სურთ, მიუხედავად იმისა, რა აზრისაა ამაზე მოსკოვი”, - განაცხადა იანს სტოლტენბერგმა და დასძინა, რომ იდეა, თითქოს პოლონეთისა და ბალტიისპირეთის ქვეყნების ალიანსში შესვლა იყო პროვოკაცია, ახალი პროვოკაციაა.

„ეს იყო სუვერენული გადაწყვეტილება. მე ასევე პატივს ვცემ შვედეთის და ფინეთის გადაწყვეტილებას, არ შეუერთდნენ ალიანსს. მთავარი არის, რომ ნატოს გაფართოება არის წევრობის მსურველი ქვეყნის და 29 მოკავშირის გადასაწყვეტი და არცერთ ქვეყანას ამ პროცესში ვეტოს უფლება არასდროს ექნება“, – განაცხადა სტოლტენბერგმა.