ქვეყნის პრეზიდენტი მიხეილ სააკაშვილი ყოველწლიური მოხსენებით პარლამენტში ხვალ, 18:00 საათისთვის გამოვა. როგორც დღეს პარლამენტის თავმჯდომარემ დავით ბაქრაძემ აღნიშნა, პრეზიდენტის პარლამენტში ყოველწლიური სიტყვით გამოსვლისას დაგეგმილ დებატებზე საპარლამენტო ოპოზიციასა და უმრავლესობას თანაბარი დრო ექნებათ.

ბაქრაძის განცხადებით, ხვალ პარლამენტში იქნება ძალიან აქტიური, მწვავე და ამავე დროს კონსტრუქციული პოლიტიკური დებატები. დებატებისას სიტყვით გამოვლენ უმრავლესობისა და უმცირესობის ლიდერები და მათ 45-45 წუთიანი დრო ექნებათ სასაუბროდ, თუმცა მათ შეეძლებათ ამ დროის გადანაწილება სხვა წევრებზე.

15-15 წუთი მიეცემათ გამოსასვლელად ფრაქციების თავმჯდომარეებს, 5-წუთიანი გამოსვლის საშუალება კი ექნებათ ვიცე-სპიკერებსა და დამოუკიდებელ დეპუტატებს. ასევე, 5-წუთიანი სიტყვით გამოსვლის საშუალება მიეცემათ დეპუტატებს გიორგი ცაგარეიშვილს, ჯონდი ბაღათურიას, დიმიტრი ლორთქიფანიძესა და გურამ ჩახვაძეს.

საპარლამენტო ფრაქცია "ქრისტიან-დემოკრატებიდან" სიტყვით ხვალ 4 წევრი გამოვა, კერძოდ, გიორგი თარგამაძე, გიორგი ახვლედიანი, მაგდა ანიკაშვილი და ლევან ვეფხვაძე.