საზოგადოება
აზიურ ფაროსანასთან ბრძოლის საკითხებზე საქართველოში რუსი სპეციალისტები იმყოფებიან
საქართველო, 12 აპრილი, საქინფორმი. სურსათის ეროვნული სააგენტოს ინფორმაციით, რუსეთის მცენარეთა დაცვის სპეციალისტები აზიური ფაროსანას გავრცელებასთან დაკავშირებით საქართველოში არსებულ ვითარებას და დაგეგმილი ღონისძიებების შესახებ ინფორმაციას გაეცნობიან.
„მავნებელთან ბრძოლის პროცესში ქართველი სპეციალისტები აქტიურად თანამშრომლობენ ყველა იმ ქვეყნის სპეციალისტთან, მათ შორის რუსეთის ფედერაციიდან, სადაც აზიური ფაროსანა გამოწვევაა. არსებული გამოცდილებების გაზიარება და კოორდინირებული მუშაობა მავნებლის პოპულაციის შემცირებაში და მის მიერ აგრარული დარგისთვის მიყენებული ზიანის მაქსიმალურად შემცირებაში დაგვეხმარება“, – აცხადებენ სურსათის ეროვნულ სააგენტოში.
უწყებაში განმარტავენ, რომ აზიურ ფაროსანასთან ბრძოლის ეფექტიანი გეგმის შემუშავების მიზნით საქართველოში მოწვეული იყო ყველა ის წამყვანი ენტომოლოგი და სპეციალისტი კანადიდან, აშშ-დან, ესპანეთიდან, იტალიიდან, შვეიცარიიდან, თურქეთიდან და აზერბაიჯანიდან, ვისაც მნიშვნელოვანი გამოცდილება აქვს აზიურ ფაროსანასთან ბრძოლის კუთხით. გაიმართა ფორუმი და არაერთი დისკუსია.
