საქართველო, 6 მარტი, საქინფორმი. „ჩვენთვის მნიშვნელოვან გამოწვევად იქცა რეგიონებს შორის უთანასწორობის პრობლემა, რაც ხშირ შემთხვევაში სოფლად ხალხს აიძულებდა, რომ დაეტოვებინათ თავიანთი სოფელი, წასულიყვნენ ქალაქში, ბევრმა მათგანმა დატოვა ჩვენი ქვეყანა“, – ამის შესახებ საქართველოს პრემიერ-მინისტრმა გიორგი კვირიკაშვილმა პარლამენტში “თვითმმართველობის რეფორმის” პრეზენტაციაზე განაცხადა.
როგორც პრემიერ-მინისტრმა აღნიშნა, საქართველოს მთავრობისთვის ერთ-ერთი უმნიშვნელოვანესი პრიორიტეტი რეგიონებს შორის ცხოვრების დონის უთანასწორობის აღმოფხვრაა. „სწორედ ამისათვის დიდი წინ გადადგმული ნაბიჯია 2014 წელს მიღებული თვითმმართველობის კოდექსი, რომელმაც შექმნა ინსტიტუციური და საკანონმდებლო ჩარჩო უმნიშვნელოვანესი ცვლილებებისთვის ჩვენს ქვეყანაში. სწორედ ეს გახლავთ ის მთავარი ღერძი და ფუნდამენტი, რომელზეც უნდა აიგოს რეფორმის უკვე შემდგომი ნაბიჯები. დღეს ჩვენ წარმოგიდგენთ დეცენტრალიზაციის საშუალოვადიან სტრატეგიულ ხედვას, რომლის მიზანიც არის, კიდევ უფრო გავაძლიეროთ და განვამტკიცოთ თვითმმართველობა ადგილობრივ დონეზე.
ჩვენი ხედვა მოიცავს სამ ძირითად მიმართულებას.
პირველი, ეს არის თვითმმართველობის უფლებამოსილების გაფართოება.
მეორე, ეს გახლავთ - თვითმმართველობას მეტი ეფექტიანობისთვის ჰქონდეს მეტი ფინანსური რესურსი და ამ ფინანსური რესურსის თანდათანობით გადანაწილებას თვითმმართველობის მიმართულებით.
მესამე, თვითმმართველობა უნდა აკმაყოფილებდეს გამჭვირვალობის და ანგარიშვალდებულების უმაღლეს სტანდარტებს. ის უნდა უზრუნველყოფდეს მოქალაქეების ჩართულობას გადაწყვეტილების მიღების პროცესში, მართვის პროცესში და, რა თქმა უნდა, ამ სამივე ღერძის ერთობლიობა ჩვენ მოგვცემს სხვა თვისობრივ შედეგს თვითმმართველობაში”, – განაცხადა გიორგი კვირიკაშვილმა.
მისივე თქმით, ჩასატარებელია კომპლექსური სამუშაოები, რომელთაც სათანადო რესურსი და დრო სჭირდება, მომზადებულია დროში გაწერილი გეგმა. „მნიშვნელოვანია, რომ ჩვენ ამაში გვეხმარებიან საერთაშორისო პარტნიორები. მინდა, მადლობა გადავუხადო მათ, რადგან მათი დახმარების გარეშე რთული იქნებოდა 2014 წელს თვითმმართველობის კოდექსის მიღება და იმედი გვაქვს, რომ მეორე ეტაპზეც გვექნება მათი მხარდაჭერა. ამ რეფორმის წარმატებით განხორციელებისათვის ასევე უმთავრესი წინაპირობაა სამოქალაქო საზოგადოების მონაწილეობა და ხალხის აქტიური ჩართულობა. სწორედ ამიტომ ის, რომ დღეს პირველივე ეტაპზე წარმოდგენილია არასამთავრობო სექტორი, მნიშვნელოვანი წინაპირობაა რეფორმის წარმატებისთვის. ამ რეფორმის სულისკვეთებას უნდა ვიზიარებდეთ ყველა და დიდი სურვილი მაქვს, რომ ჩვენ გვქონდეს თანამშრომლობა პარლამენტის ყველა წარმომადგენელთან. სამოქალაქო სექტორის ფართო ჩართულობა იყოს რეფორმის განხორციელების პროცესში. კიდევ ერთხელ მადლობა პარლამენტის თავმჯდომარეს, ვფიქრობთ, რომ ამ რეფორმის მთავარი წარმმართველი იქნება პარლამენტი, რეგიონული განვითარების სამინისტრო არის ჩართული ამაში.
მე დიდი ენთუზიაზმით ვუყურებ ამ რეფორმას. ამ რეფორმის მიღების მიზანი უნდა იყოს ის, რომ რეგიონებში იყოს როგორც გადაწყვეტილების მიღების ძალაუფლება, ასევე უნდა იყოს შესაბამისი რესურსი ამ გადაწყვეტილების მიღებისა და აღსრულებისათვის. ჩვენი ნატვრა იქნება ნამდვილად ის, რომ საქართველოში საუკეთესო განათლების მქონე ახალგაზრდებს ჰქონდეთ სურვილი, რომ მონაწილეობა მიიღონ ადგილობრივი თვითმმართველობის ხელისუფლებებში და ჰქონდეთ უდიდესი მოტივაცია, რომ რეგიონულ განვითარებას შეუწყონ ხელი”, – განაცხადა გიორგი კვირიკაშვილმა.
„დეცენტრალიზაციის სტრატეგია რვა წელზე იქნება გათვლილი“, – ამის შესახებ საქართველოს რეგიონული განვითარებისა და ინფრასტრუქტურის მინისტრმა ზურაბ ალავიძემ თვითმმართველობის ახალ რეფორმაზე საუბრისას განაცხადა, იუწყება პირველი არხი,
როგორც ზურაბ ალავიძემ აღნიშნა, დეცენტრალიზაციის და გაძლიერების კუთხით თვითმმართველობის რეფორმის სამი ძირითადი მიმართულებაა. „პირველ რიგში – მეტი საქმე და გაზრდილი პასუხისმგებლობა. მეორე – მეტი რესურსები და ფინანსების განაწილება. მესამე – გამჭვირვალობა და გადაწყვეტილების მიღებისას ადგილობრივი მოსახლეობის ჩართულობა. დეცენტრალიზაციის სტრატეგია რვა წელზე იქნება გათვლილი. ეს იქნება ქმედითი კონკრეტულ დროში, კონკრეტული დაფინანსებით. ამაზე ვმუშაობთ, პროცესში ჩართულები იქნებიან როგორც დონორი ორგანიზაციების უცხოელი, ასევე ადგილობრივი ექსპერტები”, – განაცხადა ზურაბ ალავიძემ.