სამართალი
მედიის ინფორმაციით, შვედეთში სპეცოპერაციისას დაკავებულთა შორის ქართველებიც არიან
საქართველო, 19 თებერვალი, საქინფორმი. შვედეთში პოლიციამ სპეცოპერაციის შედეგად 53 ადამიანი დააკავა, მათ შორის არიან ქართველებიც, ამის შესახებ ინფორმაციას შვედეთის პოლიცია ავრცელებს.
სპეცოპერაცია სახელწოდებით Lynx იანვარში დაიწყო და სამ კვირას გაგრძელდა.
სამართალდამცველების ცნობით, ამოღებულია დიდი რაოდენობით ცეცხლსასროლი იარაღი, მათ შორის ხელყუმბარები, ასევე ნარკოტიკული ნივთიერებები და მოპარული ნივთები.
გამოძიების ინფორმაციით, დაპატიმრებულთა ასაკი 18-დან 40 წლამდე მერყეობს. მათი უმრავლესობა ბალკანეთის რესპუბლიკებიდან, საქართველოდან და რუმინეთიდან არის.
როგორც პოლიციაში აცხადებენ, დაკავებულები ქალაქებს უფსალასა და სტოკჰოლმს შორის გადაადგილდებოდნენ. მათ სხვადასხვა დანაშაულში სდებენ ბრალს, მათ შორისაა მკვლელობა, თაღლითობა, ნარკოტიკებით ვაჭრობა და ფულის გამოძალვა.
53 დაკავებულიდან რვა ბრალდებული წინასწარ პატიმრობაში დატოვეს.
