საქართველო, 19 იანვარი, საქინფორმი. როგორც საქინფორმი გუშინ იუწყებოდა, საზოგადოებრივ-პოლიტიკური თოქშოუ „არჩევანი“ „რუსთავი 2“-ზე, რომელიც გიორგი გაბუნიას მიჰყავს, საქართველოს პრეზიდენტ გიორგი მარგველაშვილს მიეძღვნა, რომელიც შეკითხვებს ონლაინ რეჟიმში პასუხობდა. კერძოდ, პრეზიდენტმა მარგველაშვილმა მკაცრად გააკრიტიკა საქართველოს პროკურატურისა და სასამართლოების არაპროფესიონალიზმი და ანგაჟირებულობა, რომლებიც ექსპრეზიდენტ სააკაშვილის საქმეზე ვოლუნტარისტულ გადაწყვეტილებებს იღებდნენ.
საქართველოს მთავარმა პროკურატურამ საქართველოს პრეზიდენტს საგანგებო განცხადებით უპასუხა, რომელშიც მოუწოდა, უფრო თავშეკავებული იყოს და არ ჩაერიოს სასამართლოების, პროკურატურის და სამართალდამცველი ორგანოების კომპეტენციაში კონკრეტულ სისხლის სამართლის საქმეებთან დაკავშირებით:
„ბოლო დღეების განმავლობაში, საქართველოს პრეზიდენტის და მისი ადმინისტრაციის მხრიდან, საქართველოს პროკურატურისა და პროკურორების მიმართ გაკეთებულმა უსაფუძვლო განცხადებებმა სისტემატური ხასიათი მიიღო. ჩვენ ვისმენთ განცხადებებს, რაც დაკავშირებულია კონკრეტული სისხლის სამართლის საქმეების წარმოებასა და სისხლისსამართლებრივი დევნის განხორციელებასთან, რაც პროკურატურის ექსკლუზიურ უფლებამოსილებას წარმოადგენს. შევახსენებთ ყველას, რომ საქართველოს პროკურატურა და პროკურორები თავის საქმიანობაში არიან დამოუკიდებელნი და ემორჩილებიან მხოლოდ კანონს. საქართველოს პროკურატურის ინსტიტუციური დამოუკიდებლობა გარანტირებულია საქართველოს კონსტიტუციით და კანონმდებლობით, ხოლო პროკურორის საქმიანობაში ჩარევა დაუშვებელია და ისჯება კანონით. გაკეთებული განცხადებები კონკრეტულ საქმეებზე, რომლებზეც ჩატარებულია მრავალმხრივი და სრულფასოვანი გამოძიება, ასევე მიმდინარეობს სასამართლო განხილვები და არსებობს სასამართლოს გამამტყუნებელი განაჩენები, არის არაკომპეტენტური, სუბიექტური და მიზნად ისახავს საზოგადოების შეცდომაში შეყვანას. ერთადერთი ორგანო, რომელსაც პროკურატურის გადაწყვეტილებების რევიზია შეუძლია, არის სასამართლო, რაც ასევე გარანტირებულია კონსტიტუციით. პრეზიდენტის და მისი ადმინისტრაციის წარმომადგენელთა განცხადებები აშკარად ტოვებს შთაბეჭდილებას, რომ ისინი ცდილობენ შეითავსონ ხელისუფლების სხვა შტოების, პროკურატურისა და სასამართლოს ფუნქციები, რაც ცალსახად სცილდება მათი კომპეტენციის ფარგლებს. საქართველოს პროკურატურა მოუწოდებს პრეზიდენტს თავი შეიკავოს მოწოდებებისგან პროკურორების მიმართ კონკრეტულ სისხლის სამართლის საქმეებთან დაკავშირებით, რადგან ნებისმიერი მსგავსი მოწოდება ტოვებს პროკურატურაზე ზეგავლენის მოხდენის მცდელობის შთაბეჭდილებას, რაც რა თქმა უნდა, წინააღმდეგობაში მოდის ზოგადად პროკურატურის მუშაობის დამოუკიდებლობის პრინციპთან. პროკურატურა მოქმედებდა და მოქმედებს საქართველოს კანონმდებლობით მკაცრად განსაზღვრული საკუთარი კომპეტენციის ფარგლებში და ვერც ერთი პოლიტიკური პირის განცხადება ანდა ქმედება ვერ მოახდენს ზეგავლენას პროკურატურის, თუ ნებისმიერი პროკურორის საქმიანობაზე”, - ნათქვამია განცხადებაში.