სამართალი
შინაგან საქმეთა სამინისტრომ ხორავას ქუჩაზე მომხდარი განზრახ მკვლელობის ფაქტთან დაკავშირებით კიდევ სამი პირი დააკავა
საქართველო, 5 დეკემბერი, საქინფორმი. შსს-ს თბილისის პოლიციის დეპარტამენტის თანამშრომლებმა 2017 წლის 1 დეკემბერს თბილისში, ხორავას ქუჩაზე მომხდარი მკვლელობის ფაქტთან დაკავშირებით 4 დეკემბერს, გამთენიისას მოქალაქეები თ.კ., გ.შ. და ზ.წ. დააკავეს.
თ.კ-სთვის, ასევე, მისი შვილების - ლ.კ-სა და მ.კ-სთვის ცნობილი გახდა, რომ 2001 წელს დაბადებულმა, არასრულწლოვანმა გ.ჯ-მ განსაკუთრებით მძიმე დანაშაული ჩაიდინა, რაც სამართალდამცველებს არ შეატყობინეს. შესაბამისად, მოქალაქე თ.კ. დაკავებულია დანაშაულის დაფარვისთვის.
რაც შეეხება მოქალაქეებს ლ.კ-ს და მ.კ-ს, მათ მიმართ მიმდინარეობს საგამოძიებო მოქმედებები და, შესაძლოა, დანაშაულის დაფარვისა და შეუტყობინებლობისთვის სისხლის სამართლის პასუხისგებაში მისაცემ პირთა წრე გაიზარდოს.
გამოძიებამ, ასევე, დაადგინა, რომ მოქალაქეებმა გ.შ-მ და ზ.წ-მ ხელი შეუწყვეს არასრულწლოვანი გ.ჯ.-ს მიმალვას. შესაბამისად, ისინი დაკავებული არიან დანაშაულის დაფარვისთვის.
