საზოგადოება
ბაქო-თბილისი-ყარსის რკინიგზით მგზავრების გადაყვანა 2018 წლის პირველი ნახევრის ბოლოს დაიწყება
საქართველო, 29 ნოემბერი, საქინფორმი. ამის შესახებ პირველ არხს ექსკლუზიურ ინტერვიუში თურქეთის ტრანსპორტის მინისტრმა აჰმედ არსლანმა განუცხადა. “ბაქო-თბილისი-ყარსი ისტორიული მარშრუტია, რომელიც ტურისტებისთვის საინტერესო სხვა ქალაქებსაც მოიცავს. დარწმუნებული ვარ, მაგისტრალი იქნება პოპულარული როგორც მგზავრებისთვის, ისე ტვირთებისთვის“, – აღნიშნა არსლანმა.
მინისტრის განცხადებით, ეს პროექტი უფრო მეტია, ვიდრე ბაქოს, თბილისისა და ყარსის დამაკავშირებელი მაგისტრალი. „მგზავრი ან ტვირთი ჩინეთიდან ან ყაზახეთიდან დაუკავშირდება თურქეთის გავლით ხმელთაშუა ზღვის სახელმწიფოებს, სტამბოლის გავლით – სხვა ევროპულ ქვეყნებს. ბაქო-თბილისი-ყარსს არაერთი უპირატესობა აქვს, ის ამცირებს ტრანსპორტირების ხარჯებს და ტვირთის გადაზიდვის დროს“, – დასძინა მინისტრმა.
