საქართველო, 21 ნოემბერი, საქინფორმი. “კავკასიური სახლის" დამაარსებლის ნაირა გელაშვილის თქმით, მისი პროტესტი „ევროპული საქართველოს“ ერთ-ერთი ლიდერის გიგა ბოკერიასა და ტელეკომპანია „რუსთავი 2“-ისთვის „ტოლერანტობის ქომაგის“ ჯილდოს გადაცემამ გამოიწვია.
„ტოლერანტობის ქომაგის“ წოდება კავკასიურმა სახლმა რამდენიმე წლის წინ მიიღო ეთნიკური და რელიგიური უმცირესობების მხარდაჭერისთვის.
„სახალხო დამცველის, მისი აპარატის იდეა არის ჩაგრულთა გვერდში დგომა, დაუცველთა დაცვა და არა მოძალადეების გვერდით დადგომა. მან „ნაციონალური მოძრაობის“ თავკაცებს, ბოროტმოქმედებს მიანიჭა „ტოლერანტობის ქომაგის“ წოდება და თანაც, 7 ნოემბრის 10 წლისთავზე, როდესაც ათი წლის წინ არნახული ხოცვა-ჟლეტა და დარბევა განახორციელა „ნაციონალურმა მოძრაობამ“ ამ ადამიანების მონაწილეობით, ხოლო „რუსთავი 2“ ყოველთვის იყო ამ ბოროტების რუპორი და თანამოქმედი“, – აცხადებს ნაიარა გელაშვილი.
როგორც გუშინ საქინფორმი იუწყებოდა, 2017 წლის 16 ნოემბერს საქართველოს სახალხო დამცველის ოფისთან არსებულმა ეთნიკურ უმცირესობათა და რელიგიათა საბჭოებმა ტოლერანტობის საერთაშორისო დღესთან დაკავშირებით სხვადასხვა ნომინაციებში 2017 წლის „ტოლერანტობის ქომაგის“ ჯილდო საქართველოს პარლამენტის წევრს გიგა ბოკერიას, ტელეკომპანია „რუსთავი 2“-ის გენერალურ დირექტორს ნიკა გვარამიას და მწერალ ლაშა ბუღაძეს გადასცეს.