საქართველო, 30 ოქტომბერი, საქინფორმი. აშშ-ის მთავრობამ ჯონ კენედის მკვლელობისა და გამოძიების 2800-ზე მეტი საიდუმლო დოკუმენტი გაასაჯაროვა. პრეზიდენტმა დონალდ ტრამპმა განაცხადა, რომ მოსახლეობამ ბოლომდე უნდა იცოდეს იმ შემთხვევის შესახებ, რომლის გარშემოც მრავალი თეორია შეითხზა.
გასაჯაროებული დოკუმენტები ეროვნული არქივის ვებგვერდზეა ხელმისაწვდომი. ამავე დროს, ფედერალური საგამოძიებო ბიუროსა და ცენტრალური დაზვერვის სამსახურის თხოვნით, დოკუმენტების ნაწილის გამოქვეყნება გადაიდო. მათი თქმით, ფაილების ხელმისაწვდომობამ შეიძლება, ქვეყნის დაზვერვასა და თავდაცვას საფრთხე შეუქმნას.
ერთ-ერთი გასაჯაროებული დოკუმენტი ადასტურებს, რომ ფედერალური ბიურო აფრთხილებდა პოლიციას, რომ კენედის მკვლელობაში მთავარი ეჭვმიტანილის, ლი ჰარვი ოსვალდის სიცოცხლეს საფრთხე ემუქრებოდა.
ლი ჰარვი ოსვალდი კენედიზე თავდასხმიდან ორ დღეში მოკლეს: მას ღამის კლუბის მფლობელმა, ჯეკ რუბიმ ესროლა მაშინ, როდესაც ოსვალდი დალასის პოლიციის შენობიდან სამართალდამცავებს გამოჰყავდათ.
სადაზვერვო სამსახურის ერთ-ერთ დოკუმენტში საუბარია, რომ მეხიკოში, საბჭოთა კავშირის საელჩოში, ოსვალდი KGB-ს აგენტს შეხვდა. დოკუმენტში ნათქვამია, რომ ოსვალდი ესაუბრა KGB-ს დეპარტამენტის წარმომადგენელს, რომელიც "საბოტაჟსა და მკვლელობაზე" იყო პასუხისმგებელი.
გასაჯაროებულ დოკუმენტებს შორის არის 1964 წლის ფედერალური ბიუროს ანგარიში კუბის პრეზიდენტის, ფიდელ კასტროს მკვლელობის დაგეგმვაზე - კუბელ ემიგრანტთან განიხილება რა ეღირება მკვლელობის შეკვეთა.
"150 ათასი დოლარი ფიდელ კასტროს მკვლელობისთვის, კიდევ 5 ათასი ხარჯებისთვის - ეს ძალიან ბევრია", - ნათქვამია დოკუმენტში.
კიდევ ერთ დოკუმენტში საუბარია საბჭოთა კავშირის ხელისუფლების შეშფოთებაზე იმის გამო, რომ კენედის მკვლელობა "უპასუხისმგებლო გენერლებისთვის" საბჭოთა კავშირზე თავდასხმის მიზეზი გახდებოდა.
აშშ-ის 35-ე პრეზიდენტი ჯონ ფითჯერალდ კენედი მოკლეს 1963 წლის 22 ნოემბერს, როდესაც დალასის ცენტრალურ ქუჩებში ღია ლიმუზინით მოგზაურობდა და ხალხს ხვდებოდა.
1964 წლის ანგარიშის მიხედვით, რომ არანაირი ეჭვი არ არსებობს იმისა, რომ ლი ჰარვი ოსვალდი და შემდგომში მისი მკვლელი, ჯეკ რუბი საშინაო ან საგარეო შეთქმულებაში არ იყვნენ ჩართულნი.
1992 წელს აშშ-ის კონგრესმა მიიღო კანონი, რომლის მიხედვით, ეროვნულ არქივს უნდა შეეგროვებინა და გამოექვეყნებინა კენედის მკვლელობის ყველა მასალა 25 წლის განმავლობაში. საუბარია, დაახლოებით, 5 მილიონ დოკუმენტზე. დოკუმენტების გამოქვეყნების ვადა 2017 წლის 26 ოქტომბერს იწურებოდა. ამ დროისთვის გამოქვეყნებულია მასალის 90 პროცენტი.
პრეზიდენტ დონალ ტრამპს სურდა, რომ ყველა დოკუმენტს მოხსნოდა გრიფი, მაგრამ ბოლო წუთს სახელმწიფო ორგანოების თხოვნის შემდეგ გადაიფიქრა. საბოლოოდ, ყველა დოკუმენტი 180 დღის ვადაში უნდა გამოქვეყნდეს, ამ დროს შესაბამისი ორგანოები შეისწავლიან და გადაწყვეტენ, დალუქონ თუ დაარედაქტირონ კონკრეტული მონაცემები.

on.ge