საქართველო, 18 აგვისტო, საქინფორმი. 69 წლის ასაკში გარდაიცვალა საქართველოს საგარეო დაზვერვის დეპარტამენტის ყოფილი დირექტორი, სასაზღვრო ჯარების სარდალი, საქართველოს უშიშროების მინისტრის და თავდაცვის მინისტრის ყოფილი მოადგილე, გენერალ-ლეიტენანტი ვალერი ჩხეიძე.
ვალერი ჩხეიძე 1947 წელს ბაღდათის რაიონის სოფელ ქვედა დიმში დაიბადა. 1974 წელს დაამთავრა თბილისის სახელმწიფო პედაგოგიური ინსტიტუტი, 1976 წელს — უშიშროების კომიტეტის უმაღლესი კურსები, ხოლო 1984 წელს მოსკოვში - უშიშროების კომიტეტის უმაღლესი სკოლა. 1975-1982 წლებში ვალერი ჩხეიძე მუშაობდა საქართველოს სახელმწიფო უშიშროების კომიტეტში სხვადასხვა თანამდებობაზე; 1984-1987 წლებში იმყოფებოდა ავღანეთში სპეციალური დავალებით; 1992 წელს დაინიშნა უშიშროების მინისტრის მოადგილედ; 1992-1993 წლებში იყო თავდაცვის სამინისტროს სპეციალური დანიშნულების მთავარი სამმართველოს უფროსის პირველი მოადგილე.
1993-1994 წლებში ვალერი ჩხეიძე იყო სასაზღვრო ჯარების სარდალი, თავდაცვის მინისტრის მოადგილე.
1994-2004 წლებში ის იყო საქართველოს საზღვრის დაცვის დეპარტამენტის თავმჯდომარე; საქართველოს უშიშროების მინისტრის მოადგილე და საგარეო დაზვერვის დეპარტამენტის დირექტორი.
საქართველომ დაკარგა დიდი პატრიოტი და პროფესიონალი, მეგობრებმა - ერთგული მეგობარი, ხოლო ოჯახმა - მოსიყვარულე და ბრძენი მამა და ბაბუა.
„საქინფორმი“ გულწრფელად თანაუგრძნობს მეგობრებს, კოლეგებს, ოჯახს და ყველას, ვინც ამ არაჩვეულებრივ ადამიანს იცნობდა.
პანაშვიდები - პარასკევს და შაბათს, 18 და 19 აგვისტოსს, მისამართი: ლენინგრადის ქუჩა №7
გამოსვენება - კვირას, 20 აგვისტოს, ქაშუეთის ეკლესიიდან.