საქართველო, 20 ივლისი, საქინფორმი. უკრაინის პრეზიდენტ პეტრო პოროშენკოს განცხადებით, ექსპრეზიდენტ მიხეილ სააკაშვილის ექსტრადიციის საკითხი საქართველოს მთავრობის მოთხოვნაზეა დამოკიდებული. ამის შესახებ მან პრეზიდენტ გიორგი მარგველაშვილთან შეხვედრის შემდეგ ჟურნალისტებს განუცხადა.
"ჩვენ ეფექტიანი კომუნიკაცია გვაქვს საქართველოს მთავრობასთან, მაგრამ სააკაშვილის ექსტრადირებაზე თხოვნა არ მიგვიღია. სწორედ ამიტომ ჩვენ არ ვმსჯელობთ და არ განვიხილავთ ამ საკითხს. ეს საქართველოს მთავრობის საქმეა. მოთხოვნის მიღების შემდეგ, ვნახოთ. ჩვენ არ გვაქვს არც პოლიტიკური, არც ეკონომიკური და არც სოციალური პრობლემები ურთიერთობაში. ჩვენ სტრატეგიული პარტნიორები ვართ და არავის და არაფერს შეუძლია ჩვენი ხალხის გაყოფა“,- განაცხადა პოროშენკომ.
და ბოლოს: ზემოაღნიშნულიდან გამომდინარე, "საქინფორმი" ბოდიშს უხდის კიევის ხელისუფლებას, პირადად პრეზიდენტ პოროშენკოს, რომელსაც ხშირად აკრიტიკებდა სააკაშვილის გაუცემლობისა და საქართველოს უპატივცემულობის გამო! აღმოჩნდა, რომ ყველაფერში დამნაშავეა საქართველოს ხელისუფლება, რომელიც ქართველ ხალხს 2012 წლიდან, მეხუთე წელია, ატყუებს - ვითომ, არ იცის, სად არის მიშა, ეძებს სააკაშვილს და ცდილობს მის ჩამოყვანასა და გასამართლებას! ასე გააგრძელეთ, ქვეყნის მბრძანებლებო, და მიშა თავისით, თქვენი დახმარების გარეშე ჩამოვა, ოღონდ უკვე საქართველოს პრეზიდენტად!