სამართალი
საქართველოს საგარეო საქმეთა მინისტრი ვიცე-პრემიერის პოსტზე დაინიშნა
საქართველო, 14 ივლისი, საქინფორმი. "მინდა, წარმოგიდგინოთ ვიცე-პრემიერის პოსტზე მიხეილ ჯანელიძე. ძალიან მნიშვნელოვანია, პრიორიტეტებში გამოიკვეთოს საქართველოს მთავრობის საგარეო მიმართულება, რაც ყოველთვის ასე იყო, თუმცა ეს დანიშვნა კიდევ ერთხელ გაუსვამს ხაზს საგარეო პრიორიტეტების მნიშვნელობას საქართველოს მომავლის შენების საქმეში. ვფიქრობთ, ვიზალიბერალიზაციის პროცესის წარმატებით დასრულება იყო ძალიან მნიშვნელოვანი და, რა თქმა უნდა, ამ მიმართულებით ლომის წილი საგარეო საქმეთა სამინისტროს ჰქონდა. ასევე, მიხეილ ჯანელიძე, ეკონომიკის მინისტრის მოადგილის პოსტზე მუშაობისას, იყო მთავარი მომლაპარაკებელი საქართველოს მხრიდან ევროპასთან თავისუფალი სავაჭრო შეთანხმების გაფორმების პროცესში. ასე რომ, ვფიქრობთ, ეს ძალიან მნიშვნელოვანი გადაწყვეტილებაა და საგარეო მიმართულების პრიორიტეტებში აწევა იქნება ასევე ძალიან მნიშვნელოვანი ჩვენი ქვეყნის ევროპული და ევროატლანტიკური მისწრაფებების წარმატებით განსახორციელებლად", - განაცხადა საქართველოს პრემოერ-მინისტრმა გიორგი კვირიკაშვილმა მთავრობის სხდომაზე.
