საქართველო, 11 ივლისი, საქინფორმი. UNESCO-ს მსოფლიო მემკვიდრეობის კომიტეტის 41-ე სესიამ გელათის სამონასტრო კომპლექსი მსოფლიო მემკვიდრეობის ნუსხაში დატოვა. ბაგრატის საკათედრო ტაძარი კი ორგანიზაციის მფარველობიდან გავიდა.

1994 წელს გელათი, ბაგრატთან ერთად, მსოფლიო მემკვიდრეობის ნუსხაში შევიდა. 2010 წელს, ბაგრატის ტაძრის რეკონსტრუქციის შემდეგ, რომელიც ექსპრეზიდენტი სააკაშვილის პროექტის მიხედვით ჩატარდა, ყველა მის ირაციონალურ შემოთავაზებასთან ერთად, მათ შორის - თანამედროვე დიზაინის ელემენტების, თანამედროვე სამშენებლო მასალებისა და გაფორმების, ისევე როგორც შახტისა და ლიფტის - ბაგრატი და გელათი საფრთხის ქვეშ მყოფი მსოფლიო მემკვიდრეობის ძეგლთა ნუსხაში გადაიტანეს.

2013 წელს UNESCO-ს მსოფლიო მემკვიდრეობის კომიტეტმა, გაითვალისწინა რა გელათის კონსერვაცია-რეაბილიტაციის მიზნით გაწეული სამუშაოები, უპრეცედენტოდ კომპრომისული გადაწყვეტილება (37 COM 7A.32) მიიღო - საქართველოს ბაგრატის და გელათის საზღვრების მოდიფიკაცია დაევალა, რათა გელათის მსოფლიო მემკვიდრეობის ნუსხაში დამოუკიდებელი ძეგლის სტატუსით დაბრუნების შესაძლებლობა შექმნილიყო.

UNESCO-ს მსოფლიო მემკვიდრეობის კომიტეტის 41-ე სესია კრაკოვში (პოლონეთი) ჩატარდა.