სამართალი
აქცია-პერფორმანსი ფორტეპიანოთი - საგზაო მოძრაობის უსაფრთხოებისთვის

   საქართველო, 21 ივნისი, საქინფორმი. შსს-ს საგზაო მოძრაობის უსაფრთხოების კამპანიის ფარგლებში თბილისში, მარჯანიშვილის მოედანზე მდებარე ერთ-ერთ „ზებრა“-გადასასვლელთან სიმბოლური აქცია-პერფორმანსი გაიმართა.

„ზებრა“–გადასასვლელთან, სადაც სატრანსპორტო მოძრაობა შუქნიშნის მეშვეობით არ რეგულირდება, დაიდგა ფორტეპიანო, რომელზეც განთავსებული იყო საგზაო მოძრაობის უსაფრთხოების კამპანიის სტიკერები და წარწერები: „ისარგებლე „ზებრა“-გადასასვლელით“ და „გზა დაუთმე ქვეითს“. აქციის იდეის თანახმად, ფორტეპიანო და მისი კლავიატურა სიმბოლურად „ზებრა“- გადასასვლელს ასახავდა.

აქციის განმავლობაში ნებისმიერ გამვლელს შეეძლო ფორტეპიანოზე დაკვრა და ამ ფორმით საგზაო მოძრაობის უსაფრთხოების კამპანიაში ჩართვა. აქციას სხვადასხვა სამუსიკო სკოლის მოსწავლეები და გამვლელები შემოეუერთდნენ. მათ განსხვავებული ჟანრის ნაწარმოებები შეასრულეს.

აქცია-პერფორმანსის მიზანი იყო საგზაო მოძრაობის მონაწილეთა ცნობიერების ამაღლება და კიდევ ერთხელ მოწოდება, რომ ქვეითებმა ისარგებლონ „ზებრა“-გადასასვლელით, ხოლო მძღოლებმა გზა დაუთმონ ქვეითებს.