საქართველო, 21 დეკემბერი, საქინფორმი.  ეროვნული ბანკი ლარის გაუფასურებასთან დაკავშირებით,რომელიც ყოველდღე საკუთარ ანტირეკორდებს ხსნის, განცხადებას ავრცელებს, სადაც, კერძოდ, ნათქვამია:

 "გაცვლითი კურსის ბოლო პერიოდის გაუფასურების მიზეზები ფუნდამენტური ფაქტორების (დოლარის გლობალური გამყარება, თურქული ლირას გაუფასურება) და მოლოდინების ერთობლიობაა. მიუხედავად ფუნდამენტური ფაქტორებისა, ჩვენი წინასწარი შეფასებით, მიმდინარე კურსი უფრო მეტად არის გაუფასურებული, ვიდრე რაციონალური მოლოდინები განაპირობებს.

 გაცხადებული სტრატეგიის შესაბამისად, ეროვნული ბანკი გამოიყენებს მის ხელთ არსებულ ინსტრუმენტებს სავალუტო ბაზარზე ჭარბი მერყეობის შესარბილებლად, ისე, რომ ლარის კურსი ფუნდამენტურ ფაქტორებთან შესაბამისობაში დარჩეს.

 საშუალოვადიან პერიოდში ფასების სტაბილურობის რისკების შემთხვევაში, ეროვნული ბანკი გაამკაცრებს მონეტარულ პოლიტიკას. ეროვნულ ბანკს აქვს სათანადო შესაძლებლობა და ინსტრუმენტები, რომ არ დაუშვას მაღალი ინფლაცია. თავის მხრივ, ზომიერი ინფლაცია  გაცვლითი კურსის გრძელვადიან სტაბილურობას და ეკონომიკის მდგრად ზრდას განაპირობებს".

 საქინფორმი მკითხველს ატყობინებს, რომ გუშინ, ეროვნული ბანკის მიერ სავალუტო რეზერვიდან 40 მლნ აშშ დოლარის გაყიდვის მიუხედავად, ლარის კურსის გამყარება მხოლოდ 3 თეთრით მოხერხდა და მან 1 აშშ დოლარზე 2,84 ლარი შეადგინა.