საქართველო, 19 დეკემბერი, საქინფორმი. ეკონომიკისა  და  მდგრადი განვითარების მინისტრის  მოადგილე დავით ხუციშვილი ფოთის ნავსადგურში არსებულ მდგომარეობასთან დაკავშირებით ნავსადგურის მმართველი კომპანია „APM ტერმინალსის“ კომერციულ დირექტორს ჯოზეფ ქროულს  შეხვდა.

 როგორც  შეხვედრაზე აღინიშნა, 3 დეკემბერის ძლიერი შტორმის შედეგად  ფოთში  ტალღების სიმაღლემ 6 მეტრს  მიაღწია. მდინარე რიონის ადიდებამ  ზღვაში  დიდი რაოდენობის ნაშალი მასალისა  და ქვა-ღორღის ჩატანა გამოიწვია.  შედეგად ფოთის ნავსადგურში წყლის სიღრმე 5 მეტრამდე შემცირდა. „სტიქიიდან გამომდინარე, დღეს ფოთის პორტი  სრული წარმადობით ვერ ფუნქციონირებს.  ტვირთების ნაწილის  გადამისამართება ბათუმის პორტში მოხდა და მათთან 24-საათიან რეჟიმში  ვმუშაობთ. თვითონ პორტის ხელმძღვანელობაც აქტიურადაა ჩართული  ფოთიდან გადამისამართებული გემების  მომსახურების პროცესში“, - განაცხადა დავით ხუციშვილმა.

 ფოთის ნავსადგურის მმართველი კომპანიის „APM ტერმინალსის“ კომერციული დირექტორის ინფორმაციით, 7 მეტრამდე არხის  გასაღრმავებლად დაახლოებით 10 000 კუბური მეტრი ქვიშა-ღორღის ამოღებაა საჭირო, ხოლო 9 მეტრამდე - დამატებით 60 000 კუბური მეტრის. ამისთვის კომპანიას  ბულგარეთიდან სპეციალური  ტექნიკა  შემოჰყავს.

 პრობლების სრული აღმოფხვრა 28 დეკემბრამდეა დაგეგმილი.