საზოგადოება
27 782 აბიტურიენტი სტუდენტი გახდა, 1012-მა აბიტურიენტმა კი 100–პროცენტიანი გრანტი მოიპოვა

 საქართველო, 26 აგვისტო, საქინფორმი. ერთიანი ეროვნული გამოცდების საბოლოო მონაცემებით, 2016 წელს 27 782 აბიტურიენტი სტუდენტი გახდა. გამოცდების ეროვნული ცენტრის ინფორმაციით, ეს მაჩვენებელი გამოცდაზე გამოცხადებულ აბიტურიენტთა 74%-ზე მეტს შეადგენს.

 ერთიან ეროვნულ გამოცდებზე 1012-მა აბიტურიენტმა 100–პროცენტიანი გრანტი მოიპოვა - ამის შესახებ შეფასებისა და გამოცდების ეროვნული ცენტრის ხელმძღვანელმა მაია მიმინოშვილმა  პრესკონფერენციაზე განაცხადა.

 "არსებობს უფასო ფაკულტეტები, სადაც თუ აბიტურიენტები ჩაირიცხნენ, სახელმწიფოს დაფინანსებით ისწავლიან. აქედან გამომდინარე, 5000-ზე მეტი აბიტურიენტი არის ის რაოდენობა, რომლებიც სახელმწიფოს ხარჯზე ისწავლიან, მათგან 1012-მა თავად მოიპოვა ეს გრანტი", - აღნიშნა მიმინოშვილმა.

 მისივე თქმით, ეროვნულ გამოცდებზე წელს 41 ათასზე მეტი აბიტურიენტი იყო რეგისტრირებული, თუმცა, გამოსაშვები გამოცდების შემდეგ დაახლოებით 3 ათასამდე აბიტურიენტი კონკურსს გამოეთიშა.