საქართველო, 22 ივლისი, საქინფორმი. ინტერპოლის მიერ საერთაშორისო ძებნილთა წითელი ცირკულარიდან იგორ გიორგაძის მოხსნის თაობაზე განმარტებებს აკეთებს მისი ადვოკატი გაგი მოსიაშვილი.

„საერთაშორიო საპოლიციო ორგანიზაციის წესდების მე-3 მუხლის მიხედვით, დაუშვებელია რესურსის გამოყენება პირის მიმართ, რომელიც პოლიტიკური მოტივით იძებნება“, – განაცხადა საქართველოს კა–გე–ბეს ექსთავმჯდომარის ადვოკატმა.

ადვოკატი მთავარ პროკურატურასაც პასუხობს და ამბობს, რომ იგორ გიორგაძისთვის პოლიტდევნილის სტატუსის მინიჭებასთან დაკავშირებით გავრცელებული ინფორმაცია სიმართლეს არ შეესაბამება.

ცნობისათვის: წითელი ცირკულარიდან მოხსნის თაობაზე ინტერპოლს იგორ გიორგაძის ოჯახმა 3 თვის წინ მიმართა.

საქართველოს სახელმწიფო უშიშროების ყოფილი მინისტრი საერთაშორისო ძებნაში 1995 წლიდან იყო.

გამოძიება მას პრეზიდენტ ედუარდ შევარდნაძის წინააღმდეგ ტერაქტისა და ეროვნულ-დემოკრატიული პარტიის ლიდერის გია ჭანტურიას მკვლელობის ორგანიზებაში ადანაშაულებს. იგორ გიორგაძისთვის წაყენებულ ბრალდებებს საქალაქო სასამართლო განიხილავდა. საქმის პროკურორი ამჟამინდელი ეკოლოგიის მინისტრი, რესპუბლიკური პარტიის ექსწევრი გიგლა აგულაშვილი იყო.