პოლიტიკა
2016 წლის პირველ კვარტალში პირდაპირი უცხოური ინვესტიციები უპრეცედენტოდ გაიზარდა
საქართველო, 14 ივნისი, საქინფორმი. 2016 წლის პირველ კვარტალში პირდაპირი უცხოური ინვესტიციების, უპრეცედენტო ზრდა იყო და 2008 წლის შემდეგ რეკორდული მაჩვენებელი - 376 მილიონი დოლარი დაფიქსირდა, - ამის შესახებ საქართველოს პრემიერ-მინისტრმა გიორგი კვირიკაშვილმა მთავრობის სხდომაზე განაცხადა.
პრემიერის თქმით, პირველ ადგილზეა ტრანსპორტი და კავშირგაბმულობა, ხოლო შემდეგ მოდის საფინანსო და ენერგეტიკის სექტორი. პირველი ინვესტორია აზერბაიჯანი, მეორე თურქეთი, მესამე - გაერთიანებული სამეფო.
„ძალიან სასიხარულოა, რომ ასეთი მატება შეინიშნება. ეს ბევრ რამეზე მიუთითებს - სტაბილურობაზე, გაუმჯობესებულ ბიზნესგარემოზე, ინვესტორების მხრიდან საქართველოს, როგორც კარგი საინვესტიციო მიმართულების ჩამოყალიბებასა და დანახვაზე და ეკონომიკური ბლოკის კარგ მუშაობაზე“, - აღნიშნა პრემიერ-მინისტრმა.
