სამართალი
თბილისის საქალაქო სასამართლომ ერეკლე კოდუა დამნაშავედ ცნო
საქართველო, 28 მარტი, საქინფორმი. თბილისის საქალაქო სასამართლომ ერეკლე კოდუა დამნაშავედ ცნო სამსახურებრივი უფლებამოსილების გადამეტების ორ ეპიზოდში.
უტყუარად დადასტურდა, რომ 2008 წლის 29 აგვისტოს სპეციალური ოპერატიული დეპარტამენტის დირექტორმა ერეკლე კოდუამ ნარკოტიკული საშუალების უკანონო შეძენა-შენახვის ფაქტზე დაკავებულ მერაბ რობაქიძეს, არასაპატიმრო სასჯელზე საპროცესო შეთანხმების გაფორმების სანაცვლოდ, სახელმწიფოსთვის გადასაცემად 90 000 აშშ დოლარად აყიდინა ორი ავტომანქანა, რომელთაგან ერთ-ერთი - 45 000 აშშ დოლარად ღირებული LEXUS GX 470 ე. კოდუამ სახელმწიფოზე გადაცემის ნაცვლად თავისი შვილის სახელზე გააფორმა. აღნიშნული დანაშაულის ჩადენისთვის პროკურატურამ ე. კოდუას ბრალი საქართველოს სსკ-ის 333-ე მუხლის პირველი ნაწილითა და 180-ე მუხლის მე-3 ნაწილის „ა“ და „ბ“ ქვეპუნქტებით წარუდგინა. თბილისის საქალაქო სასამართლომ ბრალდებული დაუსწრებლად ცნო დამნაშავედ საქართველოს სსკ-ის 333-ე მუხლის პირველი ნაწილით გათვალისწინებული დანაშაულის ორი ეპიზოდისთვის.
