აქტუალური
ავღანეთში, ბაგრამის საავიაციო ბაზაზე ქართველი სამხედროების დაჯილდოების ცერემონიალი გაიმართა
საქართველო, 15 მარტი, საქინფორმი. ტაქტიკური დაჯგუფება „ბუფალოს" შემადგენლობაში შემავალმა ჩეხმა სამხედროებმა „მტკიცე მხარდაჭერის" მისიაში მონაწილე პარტნიორი ქვეყნების წარმომადგენლებს „გამოჩენილი პროფესიონალიზმისა და კოორდინირებული მუშაობისთვის" მესამე ხარისხის მედლები გადასცეს.
დაჯილდოებულთა შორის აღმოჩნდნენ 22-ე ბატალიონის მეთაური, ვიცე-პოლკოვნიკი მანუჩარ ბარბაქაძე და ბატალიონის სერჟანტი გურგენ ნარსია, ასევე ამერიკის არმიისა და საზღვაო ქვეითთა კორპუსის ოფიცრები და სერჟანტები.
საქართველოს შეიარაღებული ძალების II ქვეითი ბრიგადის 22-ე ბატალიონი "მტკიცე მხარდაჭერის" მისიაში 2015 წლის ოქტომბრიდან მონაწილეობს. ქართული ქვედანაყოფი უზრუნველყოფს ბაზის უსაფრთხოებას და საპატრულო ოპერაციებს ატარებს.
