საქართველო, 29 თებერვალი, საქინფორმი. საქართველოს თავდაცვის მინისტრმა თინათინ ხიდაშელმა დიდი ბრიტანეთისა და ჩრდილოეთ ირლანდიის გაერთიანებულ სამეფოში საქართველოს ელჩს უმასპინძლა. თამარ ბერუჩაშვილი დიპლომატიურ სამსახურს გაერთიანებულ სამეფოში 1 მარტიდან შეუდგება.
„ჩვენს სამხედროებს შესაძლებლობა აქვთ, დიდი ბრიტანეთის საუკეთესო სკოლებში მიიღონ განათლება. ვთანამშრომლობთ ნატო-საქართველოს ერთობლივ პაკეტში“, – აღნიშნა თინათინ ხიდაშელმა.
შეხვედრაზე განხილული თემები თამარ ბერუჩაშვილმა შეაჯამა: „ბრიტანეთი საქართველოს ევროატლანტიკური პროცესების ერთ-ერთი ყველაზე უფრო მკაფიო და აქტიური მხარდამჭერია. შეხვედრა, ძირითადად, თანამშრომლობის იმ პრიორიტეტებს შეეხო, რომლებიც საქართველო-ბრიტანეთის სამხედრო თანამშრომლობის დღის წესრიგში უკვე ფიგურირებს; ასევე შევეხეთ იმ სიახლეებს, რომლებიც გვინდა შევიტანოთ მომავალი წლების განმავლობაში - ეს ეხება კადრების მომზადებას, მეტი ქართველი სამხედროს ჩართულობას იმ ერთობლივ პროექტებში, რომლებიც განხორციელდება; ასევე მაღალ და საშუალო დონეზე ვიზიტების დაგეგმვას, რომლებმაც კიდევ ერთხელ ხელი უნდა შეუწყოს ჩვენი ორმხრივი პარტნიორობის განვითარებას სამხედრო სფეროში“.