საქართველო, 4 დეკემბერი, საქინფორმი. საქართველოს თავდაცვის მინისტრის მოადგილე ანა დოლიძე სტამბოლში, თურქეთის რესპუბლიკის შეიარაღებული ძალების აკადემიების სარდლობას ეწვია, სადაც შეხვედრები გამართა შეიარაღებული აკადემიების მეთაურთან, გენერალ-ლეიტენანტ თაჰირ ბექიროღლუსთან, შეიარაღებული ძალების მართვისა და ადმინისტრირების უმაღლესი აკადემიის მეთაურთან, ბრიგადის გენერალ ალი აქიურექთან და იმ ქართველ სამხედრო მოსამსახურეებთან, რომლებიც აკადემიაში სწავლობენ. შეხვედრას  საქართველოს შეიარაღებული ძალების წარმომადგენლები -  ბრიგადის გენერალი გიორგი სურმავა და ვიცე-პოლკოვნიკი რევაზ ნიკოლეიშვილი დაესწრნენ. 

გენერალ-ლეიტენანტ თაჰირ ბექიროღლუსთან შეხვედრისას მხარეებმა  ორ ქვეყანას შორის სამხედრო-საგანმანათლებლო სფეროში თანამშრომლობის საკითხები და სამომავლო პერსპექტივები განიხილეს.

ბრიგადის გენერალმა ალი აქიურექმა ქართულ მხარეს  თურქეთის რესპუბლიკის შეიარაღებული ძალების მართვისა და ადმინისტრირების უმაღლესი აკადემიის ფუნქციონირების, მიზნების, ამოცანების და სასწავლო პროგრამების შესახებ დეტალური ინფორმაცია მიაწოდა.