უცხოეთი
მოსკოვმა ანტიტერორისტული რეჟიმი შემოიღო
საქართველო, 18 ნოემბერი, საქინფორმი. საფრანგეთში მომხდარი ტერაქტებისა და გერმანიასა და დიდ ბრიტანეთში ანტიტერორის განსაკუთრებული რეჟიმის შემოღების შემდეგ, რუსეთი ასევე მიიღებს განსაკუთრებულ ზომებს ტერაქტების აღსაკვეთად დედაქალაქსა და რუსეთის სხვა ქალაქებში. სრული ძალითაა ამოქმედებული შსს–ს, ეფ–ეს–ბე–სა და თავდაცვის სამინისტროს რიგი ქვედანაყოფებისა და სხვა სპეცსამსახურების საკონტროლო, აგენტურული, ტენიკური და ოპერატიულ–საგამოძიებო შესაძლებლობები.
მთელ ქვეყანაში დაწყებულია ტრანსპორტის, საზოგადოებრივი თავშეყრის ადგილების, სკოლების, უმაღლესი სასწავლებლების, სავაჭრო ცენტრების, მეტროს ტოტალური შემოწმებები. ამუშავდა საეჭვო კომუნიკაციების კონტროლის სისტემები, იმის ანალოგიური, რაც გამოიყენება დასავლეთში ტერორისტთა მოსაძებნად და აღმოსაჩენად.
უწინ რუსეთის ნაციონალურმა ანტიტერორისტულმა კომიტეტმა განაცხადა, რომ პარიზში მომხდარ შემზარავ ტერაქტებთან და, ასევე, „ისლამური სახელმწიფოს“ მიერ ევროპასა და რუსეთში ჯიჰადის გამოცხადებასთან დაკავშირებით, რფ–ის უშიშროების სისტემა სრულ საბრძოლო მზადყოფნაშია.
