საზოგადოება
ამერიკა-საქართველოს სტრატეგიული პარტნიორობის კომისიის სამუშაო ჯგუფი სასამართლო რეფორმას დადებითად აფასებს
საქართველო, 17 ნოემბერი, საქინფორმი. აშშ დადებითად აფასებს საქართველოში სასამართლო სისტემაში განხორციელებულ რეფორმებს, ისევე, როგორც გენერალურ პროკურატურასა და შს სამინისტროში განხორციელებულ და მიმდინარე რეფორმებს.ამის შესახებ აღინიშნა აშშ-საქართველოს სტრატეგიული პარტნიორობის კომისიის დემოკრატიისა და მმართველობის სამუშაო ჯგუფის შეხვედრაზე ვაშინგტონში.
აშშ-მა მოიწონა საქართველოს განზრახვა წინასასამართლო პრობაციის სამსახურის შექმნის შესახებ და მოელის, რომ ეს განზრახვა სწრაფად განხორციელდება.
აღინიშნა საქართველოს წარმატებები სამართალდამცავი და უშიშროების სამსახურების, ადმინისტრაციული და წინასწარი პატიმრობის და სასჯელაღსრულებითი სისტემის რეფორმებში.ზემოაღნიშნული და სხვა რეფორმების განხორციელება კიდევ უფრო აძლიერებს საქართველოს დემოკრატიას და ხელს უწყობს საქართველოს თავისი ევროპული და ევროატლანტიკური ინტეგრაციის მიზნების მიღწევაში. აშშ-მა საქართველოს აღუთქვა, რომ გააგრძელებს ამ მიზნების მიღწევაში მის მხარდაჭერასა და დახმარებას.
